نومان کورتولموش: پێڤاژۆیێ ب ئیرادەیا ئیمرالیێ دەست پێ کر

سەرۆکێ پارلامەنتۆیا ترکیەیێ نومان کورتولموش، ل پارێزگەھا شرنەخێ یا باکورێ کوردستانێ بەشداری “مەراسیما ببیرئانینا حەزرەتێ نووح” بوو و دەربارێ قانوونا چارچۆڤەیا پێڤاژۆیا چارەسەریێ دە داخویانیێن گرینگ دان. کورتولموش دەستنیشان کر کو ڤێ پێڤاژۆیێ ب ئیرادەیا ئیمرالیێ دەست پێ کریە و ھێڤیا خوە ئانی زمان کو مژار بەری بێهنڤەدانا پارلامەنتۆیێ بهێت چارەسەرکرن.

کورتولموش بال کشاند سەر ھەلوەستا پەکەکێ و راگھاند کو ل گۆرا چاڤداریێن وان، بریارداریا رێخستنێ یا د ڤێ مژارێ دە تەمام و زەلالە. سەرۆکێ پارلامەنتۆیێ گۆت:

“ئیمرالیێ راگھاند کو سەردەما شەرێ چەکداری ب داوی بوویە و جھێ چەکان نینە؛ ژ نھا و پێ ڤە دێ تێکۆشینەکا دەمۆکراتیک دەست پێ بکە. ھەکە رێخستنێ ئیرادەیەکا وھا نیشان نەدابا و بریارا ‘نەھشتنا رێخستنێ’ تونە بوویا، دەستپێکرنا ڤێ پێڤاژۆیێ نە پێکان بوو.”

کورتولموش ھەر وەھا دیار کر کو لھەڤکرنا پارتیێن سیاسی د بن بانێ کۆمیسیۆنێ دە نیشانەیا ھەری مەزن یا بریارداریا سیاسییە و بانگ ل ھەموو ئالیان کر کو ل دژی ئاژاوەگێریان بالدار بن و زمانێ ئاشتیانە بپارێزن.

سەرۆکێ پارلامەنتۆیێ دەربارێ ناڤەرۆکا قانوونا کو تێ ئامادەکرن دا ئاگاھیێن تەکنیکی پارڤە کرن و دەستنیشان کر کو ئەڤ رێزکنامە نابە عەفوویەکا گشتی. خالێن سەرەکی یێن قانوونێ وھا ھاتن رێزکرن:

قانوون دێ نە دایمی بە، ژ بۆ دەمەکێ (وەک 6 مەھ، 8 مەھ یان سالەکێ) سینۆردارکری بە.

تەنێ ئەو ئەندامێن کو چەکێن خوە دەینن و دەست ژ چالاکیێن رێخستنی بەردن دێ بکاربن ژ ڤێ قانوونێ سوودێ وەرگرن.

تەمامکرنا پێڤاژۆیا ڤەگەرێ و بێچەککرنێ د دەما ھەری نێزیک دەیە، بێیی کو دەم بهێت درێژکرن.

کورتولموش د داویا ئاخافتنا خوە دە دەستنیشان کر کو ھەکە پارتیێن ل پارلامەنتۆیێ بەری ئامادەکرنا قانوونێ ل ھەڤ بکن، دەرکەتنا وێ یا ژ پارلامەنتۆیێ دێ پر ھێسانتر ببە.