یاسایا نوویا پێڤاژۆیا ئاشتیێ لێبۆرینا گشتی ل خوە ناگرە
سەرۆکێ پارلەمانا ترکیەیێ نومان کورتولموش راگھاند، یاسایا نوویا گرێدایی “پێڤاژۆیا ئاشتیێ” لێبۆرینا گشتی ل خوە ناگرە، لێ تەنێ ژ بۆ وان کەسانە کو چەکان داتینن و ڤەدگەرن سەر ژیانا ئاسایی.
نومان کورتولموش د داخویانیەکێ دە ژ مەدیایا وەلاتێ خوە رە ئاشکەرە کر، ئامادەکاریێن یاسایا پێڤاژۆیا ئاشتیێ %80 تەمام بوونە. کورتولموش دیار کر، ئەو ھێڤی دکن بەری پارلەمان دەرکەڤە بێھنڤەدانا ھاڤینێ، ئەڤ یاسا ب داوی ببە داکو “ترکیە نەفەسەکە ئارام بستینە.”
سەرۆکێ پارلەمانێ تەکەز کر، ھەکە داخوازا چەکدانانێ تونە با، وان پێنگاڤەکە وھا نهدئاڤێت. کورتولموش دەربارێ ناڤەرۆکا یاسایێ دە گۆت: “ئەڤ یاسا دێ ژ بۆ دەمەکە دیارکری بە و ب ت ئاوایی نابە لێبۆرینا گشتی. تەنێ ئەو کەسێن کو چەکێن خوە داتینن و دخوازن ڤەگەرن ناڤ ژیانا سڤیل دکارن ژ ڤێ رێنمایا یاسایی سوود وەربگرن.”
کورتولموش ھەر وھا بانگ ل ھەموو ئالیان کر کو د داخویانیێن خوە دە بالدار بن و رێ نەدن ت ھەولدانێن تێکدەرانە، داکو زرارێ نەگھینن پێڤاژۆیێ.
ھەولێن ژ بۆ ئاشتیێ
پێڤاژۆیا نوویا ئاشتیێ کو د ناڤا سالا 2026ان دە گھیشتیە قۆناغەکە گرنگ، ب چەند پێنگاڤێن سورپریز دەست پێ کربوو. سەرۆکێ مهههپ دەولەت باھچەلی د داویا 2024ان دە، ب ئاوایەکی چاڤەرێنەکری بانگ ل ئابدوڵاھ ئۆجالان کر کو بێ پارلەمانێ و بداویبوونا پهكهكێ راگھینە.
دەستپێکا 2025ان ئابدوڵاھ ئۆجالان ژ زیندانا ئیمرالیێ پەیامەکە ڤیدیۆیی بەلاڤ کر و داخوازا بداویکرنا خەباتا چەکداری کر. د تیرمەھا 2025ان ژی، وەک پێنگاڤەکە سەمبۆلیک، ھەژمارەک گەریلایێن پهكهكێ ل دەڤەرا شارباژێرا سلێمانیێ چەکێن خوە شەوتاندن و دەڤ ژ شەر بەردان.
د قۆناغا نھا دە، کۆمیسیۆنەکە ھەڤبەشا پارلەمانا ترکیەیێ کار ل سەر نەخشەرێیەکە یاسایی دکە، داکو ئاوایێ چەکدانینێ و ڤەگەرا چەکداران بۆ ژیانا سڤیل برێکوپێک بکە.
