میتحەد سانجار: پێڤاژۆیا ئاشتیێ ل سەر گارانتیێن یاسایی ئاڤا دبیت
ئەندامێ شاندەیا ئیمرالیێ و پارلامەنتەرێ دەم پارتیێ میتحەد سانجار، دەربارێ نیقاشێن ل سەر پێڤاژۆیا چارەسەریێ داخویانیێن گرنگ دان و راگھاند کو مسۆگەرکرنا ئاشتیێ تنێ ب گارانتیێن یاسایی و ناسکرنا فەرمی یا رۆلا عەبدوللاھ ئۆجالان دێ هێتە کرن.
سانجار د کۆنفەرانسا ب ناڤێ “ل ترکیەیێ پێڤاژۆیا ئاشتیا جڤاکی و میناکێن دنیایێ” دا ئاخڤی و بال کشاند سەر گرنگیا پێناسەکرنا گاڤان. سانجار دیار کر کو ناڤلێکرنا راست باندۆرێ ل ئەنجامێ دکەت و گۆت: “ژ بۆ مە ئەڤ مەشە، ‘پێڤاژۆیا ئاشتی و جڤاکا دەمۆکراتیکە’.” وی ھەر وھا بکارئانینا تێگەھا “تەرۆرێ” رەخنە کر و دەستنیشان کر کو ئەڤ زمانە فکارێن ل سەر نیەتپاکیا دەولەتێ مەزن دکەت.
“چەکبەردان بنگەھا چارەسەریێیە”
میتحەد سانجار بال کشاند سەر بانگا 27ێ شوباتێ و دیار کر کو ل ترکیەیێ، بەرەڤاژی ئەزموونێن ل جیھانێ، قۆناغا چەکبەردانێ وەکی دەستپێکا پێڤاژۆیێ ھاتیە قەبوولکرن دا کو بنگەھا چارەسەریێ ب ئاوایەکی ساخلەم بهێت ئاڤاکرن.
سانجار داخواز کر کو “قانوونا چارچۆڤەیێ” ب رەنگەکی بەرفرەھ و گشتگیر بهێت ئامادەکرن و وھا پێ دا چوو:
“پێڤاژۆیێن ئاشتیێ ل سەر بنگەھا باوەریا کەسانە ئاڤا نابن، بنگەھا وان گارانتیێن یاسایی نە. دڤێت د یاسایا نوو دا ژ بۆ چەکبەردان و ئەنتەگراسیۆنێ میکانیزمایێن زەلال ھەبن و مافێ سیاسەتا ئازاد و دەمۆکراتیک وەکی ستوونا بنگەھین یا چارەسەریێ بهێت پاراستن.”
“رۆلا ئۆجالان یا د یاسایێ دا داخوازەکا سرووشتی یە”
سانجار تەکەز کر کو کلیلکا ڤێ پێڤاژۆیێ ل ئیمرالیێیە و رۆلا ئۆجالان وھا نرخاند: “رێیا ڤێ پێڤاژۆیێ راستەراست ژ ئالیێ برێز ئۆجالان ڤە ھاتیە ڤەکرن. ژ بلی وی چ کەس نەدشیا بانگەکا وھا دیرۆکی بکەت کو باندۆرێ ل سەر بریارا کۆمان بکەت. ژ بەر ڤێ یەکێ، ناسکرنا رۆلا وی د ناڤ یاسایێ دا داخوازەکا ل گۆری سرووشتێ کاری یە و دڤێت ئەڤ رۆلە ب فەرمی بهێت قەبوولکرن.”
د داویا گۆتارا خوە دا، پارلامەنتەرێ دەم پارتیێ ئانی زمان کو ھەکە ئارمانجا بنگەھین بداویکرنا ڤی شەرێ گران بیت، دڤێت دەولەت ڤێ راستیا سیستەماتیک یا دانوستاندنان و ھەبوونا موخاتەبان قەبوول بکە.
