مەسروور بارزانی: ئەم د کاروانێ ئاڤادانیێ دە بەردەوامن
سەرۆکوەزیرێ ھەرێما کوردستانێ مەسروور بارزانی، ئیرۆ یەکشەمێ (19ێ تیرمەھا 2026ێ) ب مەراسیمەکە فەرمی پرۆژەیا ستراتەژیکا ئاڤا ڤەخوارنێ یا بالندا – بارزان ڤەکر. سەرۆکوەزیر د مەراسیمێ دە گۆتارەک پێشکێش کر و کێفخوەشیا خوە ب تەمامبوونا ڤی کاری ئانی زمان و دەستنیشان کر کو پێشکەفتنا کوردستانێ و بەردەوامیا کاروانێ ئاڤادانیێ، ئەنجاما خوینا شەھیدانە. سەرۆکوەزیر بانگ ل وەلاتیان کر کو ئاڤێ ب فیرۆ نەدن و چاندا پاراستنا ژینگەھێ بپارێزن، ھەر وەھا تەکەز کر کو ئەو دێ د جیبجیکرنا پرۆژەیێن خزمەتگوزاریێ دە ل ھەموو دەڤەرێن کوردستانێ بەردەوام بن.
سەرۆکوەزیر مەسروور بارزانی د گۆتارا خوە دە بال کشاند سەر رەوشا سیاسی و ئەولەھیێ یا ناڤچەیێ و راگھاند کو ھەرێما کوردستانێ نە پارچەک ژ شەر و ئالۆزیێن ھەرێمییە، لێ تەڤی ڤێ یەکێ ژی زیانەکا مەزن گھیشتیە ھەرێمێ. بارزانی دیار کر کو ئێریشێن ل سەر ھەرێما کوردستانێ چ بەهانەیان قەبوول ناکن؛ دڤێت د زووترین دەم دە وەرن راوەستاندن ژ بەر کو شەر د بەرژەوەندیا چ ئالیەکی دە نینە.
دەربارێ پەیوەندیێن لگەل حکوومەتا فەدەرالا ئیراقێ دە، مەسروور بارزانی ئەشکەرە کر کو پەیوەندیێن وان یێن لگەل بەغدایێ د ئاستەکێ پر باش دە نە و ئەو د پشتگریکرنا حکوومەتا سەرۆکوەزیر عەلی زەیدی دە بەردەوام دبن. سەرۆکوەزیر داخواز ژ حکوومەتا ئیراقێ کر کو دەستوورا وەلات بێی جوداھی جیبجی بکە، مافێن دارایی و قانوونی یێن خەلکێ ھەرێما کوردستانێ مسۆگەر بکە.
د داویا گۆتارا خوە دە، سەرۆکێ حکوومەتێ رەخنە ل ئاستەنگیێن ل پێشیا پێکانینا حکوومەتا نوو و چالاککرنا پارلامەنتۆیا کوردستانێ گرتن و دا زانین کو زەرەرمەندێ یەکەم ژ ڤێ رەوشێ خەلکێ ھەرێمێیە. بارزانی بانگ ل ھەموو ئالیێن سیاسی کر کو ئەگەر ب راستی د خەما بەرژەوەندیێن گشتی و خەلکێ دە نە، بلا وەرن روونن و د زووترین دەم دە پارلامەنتۆیێ چالاک بکن.
