کۆمیسیۆنا یەکێتیا نەتەوەیی ل ئامەدێ هێرشێن ل سەر پێشمەرگەیان شەرمەزار کرن

کۆمیسیۆنا ھەولدانا یەکیتیا نەتەوەیی یا کوردستانێ ل ئامەدێ ب داخویانیەکە چاپەمەنیێ ئێرشێن ئیرانێ یێن ل سەر بارەگەھێن پارتیێن رۆژھلاتێ کوردستانێ شەرمەزار کرن.

کۆمیسیۆنێ د داخویانیا خوە دە بال کشاند سەر شەھید و بریندارێن کۆمەلە و پاکێ و دیاركر کو ئەڤ ئێرش ل دژی ھەر چار پارچەیێن کوردستانێ نە.

ل گۆری ئاگاھیێن کو کۆمیسیۆنێ پارڤە کرنە، سێ رۆژ بەرێ د ئەنجاما ئێرشا ب مووشەک و درۆنان یا ل سەر ناڤەندێن کۆمەلەیا شۆرەشگەر یا زەحمەتکێشێن کوردستانا ئیرانێ یا ل دەردۆرا سلێمانیێ دە، 9 پێشمەرگە شەھید کەتنە و گەلەک پێشمەرگە ژی بریندار بوونە.

ھەروه‌ھا دۆھ ئیرانێ ل سەر بەرگەھێن سڤیل یێن ل رۆژھلاتێ کوردستانێ ئێرشەک پێک ئانی و د ڤێ ئێرشێ دە ژی 8 پێشمەرگەیێن پارتیا ئازادییا کوردستانێ (پاک) بریندار بوون.

تێ گۆتن کو رەوشا 4 پێشمەرگەیان گرانە و ژیانا وان د خەتەرێ دەیە.

“ئەڤ ئێرش ل دژی ھەموو مللەتێ کوردن”

کۆمیسیۆنا ھەولدانا یەکیتیا نەتەوەیییا کوردستانێ ئەڤ ئێرشێن ئیرانێ وەکی ئێرشێن ل دژی مللەتێ کورد و ھەموو پارچەیێن کوردستانێ پێناسە کرن و د داخویانیێ دە ھات گۆتن:

“ئیرانێ د ھەر ئاستا دیرۆکێ دە ل دژی تەڤگەرێن کوردستانی و نەتەوەیا کورد سیاسەتەکە ھۆڤانە و ژەنۆسیدال مەشاندیە.

ئەڤ ئێرشێن کو ل ھەر پارچەیێ کوردستانێ چێدبن باندۆرێ ل سەر ھەموو نەتەوەیا کورد دکن. ئێشا رۆژھلاتێ کوردستانێ ئێشا ھەموو کوردانە. ئێشا باشوور، باکور و رۆژئاڤا ژی ژ ھەڤ جودا نینە.”

کۆمیسیۆنێ دەستنیشان کر کو چ ھێز نکارە ب مووشەک، درۆن، زیندان و بدارڤەکرنان داخوازا ئازادیێ یا مللەتێ کورد و سەرخوەبوونا کوردستانێ ژ ھۆلێ راکە.

بانگی حکوومەت و سازیێن ناڤنەتەوەیی ھات کرن

ئالیێن کوردستانی بانگی حکوومەتا ھەرێما کوردستانێ، حکوومەتا ئیراقێ، نەتەوەیێن یەکبوویی و یەکیتیا ئەورۆپایێ کر کو ل ھەمبەری ڤان بوویەران بێ دەنگ نەمینن.

وان خوەست کو ژ بۆ پاراستنا سڤیلان و کێمکرنا ئالۆزیێ گاڤێن پێویست وەرن ئاڤێتن و پشتگریێ بدن رێبازێن کو ل گۆری یاسایا ناڤنەتەوەیی نە.

کۆمیسیۆنێ د داویا داخویانیا خوە دە پێشمەرگەیێن شەھید ب رێز و حورمەت ب بیر ئانین، سەرساخی ژ مالباتێن وان رە خوەست و شیفایا لەزگین ژ بۆ برینداران خوەست.

ئالیێن بەشدارێن داخویانیێ

ئەڤ داخویانی ژ ئالیێ ڤان پارتی و رێخستنان ڤە ھات ئیمزەکرن:

ئینیسیاتیڤا نەتەوەیی یا کوردستانێ

پێلکورد

پارتیا سۆسیالیستا کوردستانێ (پسک)

پارتیا وەلاتپارێزێن کوردستانێ (پوک)

تەڤگەرا ڤەژینێ یا کوردستانێ

کەسایەتێن سەربخوە یێن کوردستانی