شاندا ئیمرالیێ پەیاما ئۆجالان ئەشکەرە کر: دڤێت چەک ژ دەورێ بێن دەرخستن و رووپەلەکا نوو بهێت ڤەکرن
شاندا ئیمرالیێ دەربارێ ھەڤدیتنا خوە یا ھەری داوی یا لگەل عەبدوللاھ ئۆجالان داخویانیەکا چاپەمەنیێ بەلاڤ کر. د داخویانیێ دە ھاتە راگھاندن کو ئەو د ھەلوەستا خوە یا مەشاندنا پێڤاژۆیێ دە ب بریارن و ژ بۆ بداویانینا پەڤچوونان و دانانا چەکان، بانگ ل پەرلەمانێ ترکیەیێ و ھەموو سازیێن پێوەندیدار ھاتە کرن کو بەرپرسیاریا خوەیا یاسایی بینن جھ.
د داخویانیا شاندەیێ دە بال ھاتە کشاندن سەر روحێ بانگا 27ێ شوباتێ و ھاتە دەستنیشانکرن کو تفاقا کورد و ترکان ل ئاناتۆلیێ راستیەکا دیرۆکییە. د داخویانیێ دە ئەڤ نرخاندن جھ گرت: “ڕاستییا ‘ئەگەر تو کوردان ژ ترکان جودا بکی کورد نامینن، ئەگەر تو ترکان ژ کوردان جودا بکی ترک نامینن’ ئافراندنا یاسایا وەکھەڤیێ و ژیانەکا ھەڤپار فەرز دکەت. ژ بەر ڤێ یەکێ، دەم ھاتیە کو زەمینەکا یاسایی بهێت ئاڤاکرن کو حەساسیەتا ھەموو ئالیان بەرچاڤ بگریت.”
د بەردەوامیا داخویانیێ دە بەحسا راپۆرا کۆمیسیۆنا دەمۆکراسی، خوشک-براتی و پشتەڤانیا مللی یا ل پەرلەمانێ ترکیێ ھاتە کرن و ھاتە دیارکرن کو ژ بۆ دەستپێکرنا پێڤاژۆیەکا نوویا یاسایی، دڤێت ژ نێزیکاتیێن تەنگ دوور بکەڤین. ھاتە گۆتن کو ژ بۆ شەر و چەک ب تەمامی ژ دەورێ بێن دەرخستن و رووپەلەکا نوویا ئاشتیێ بێ ڤەکرن، پێویستی ب گاڤێن وێرەک و نێزیکاتیەکا ب سەبر ھەیە.
شاندەیا ئیمرالیێ تەکەز کر کو ژ بۆ بەردەوامیا ڤێ تفاقێ دڤێت گارانتیێن یاسایی بێنە دابینکرن و سیستەم ڤەگوھەریت یاسایەکا پۆزەتیف کو ژیانا ئازاد و وەکھەڤ ل سەر بنگەھا کۆمارەکا دەمۆکراتیک مسۆگەر بکەت. ھاتە دیار کرن کو دیرۆک فرسەندەکا گرینگ ددە کو ژ نوو ڤە ژیانەکا ھەڤپار و د ناڤا عەدالەتێ دە بهێت ئاڤاکرن.
د قۆناغا داوی یا داخویانیێ دە، شاندەیێ بانگا ئۆجالان وەکی “گاڤێن دیرۆکی” نرخاند و دیار کر کو ئەو دێ د سەری دە لگەل پەرلەمانی و لگەل ھەموو ئالیێن سیاسی و جڤاکی دیالۆگا چێکەر دەوام بکن دا کو پێڤاژۆ بگھیتە ئەنجامەکێ ماییندە و دەستووری.
