ژ سوورێن ئامەدێ ھەتا بسملێ: کێلیا ئاشکەرابوونا پلانا تەڤلیھەڤکرن و تەسلیمیەتێ

گەشەدانێن سیاسی یێن داویێ یێن پشتی بانگا سەرۆکێ مەھەپێ دەولەت باخچەلی یا ب ناڤێ “ترکیەیا بێ تەرۆر”، راستیا ل پاش پەردێ خست بەر چاڤان. ئەڤ ھەڤکاریا نوو و نێزیکبوونا لەزگین نیشان ددە کو د هزرا دەولەتێ و مەھەپێ دە چ گوھەرتن چێنەبوویە؛ بەرۆڤاژی ڤێ یەکێ، خەتا کو ھاتیە گوھەرتن و گاڤ ب گاڤ نێزیکی سیاسەتا فەرمی یا دەولەتێ دبیت، پەکەکە و رێبەرێ وێ عەبدوللاھ ئۆجالان بخوەیە.

پێڤاژۆیا کو ب رێیا شاندا دەم پارتیێ و داخویانیێن ئۆجالان دەست پێ کری، د ماھیەتا خوە دە نە گوھەرتنەکا ژ نشکاڤەیە. ئەڤ رەوش ئەنجاما سیاسەتا سالانە کو ب ناڤێ “چارەسەریێ” داخوازێن نەتەوەیی و رەوایێن گەلێ کورد بێباندۆر دکە و ریا حەلاندنێ خورتتر دکە.

پشتی دالقاندنا وێنەیێن باخچەلی و ئالێن مەھەپێ ل سەر سوورێن دیاربەکرێ کو سەمبۆلا بەرخوەدانا دیرۆکی یا شێخ سەعید و بیرئانینا ھەزاران شەھیدانە ڤێ جارێ ھەمان ئالا ل پرا بسملێ ھاتن بلندکرن. ئەڤ دیمەن د ناڤ رایا گشتی یا کورد دە وەکی ھەولدانا شکاندنا روومەتا نەتەوەیی و سەمبۆلیزەکرنا تەسلیمیەتێ ھات نرخاندن.

د ھەمان دەمێ دە، بەلاڤبوونا ھندەک بەلگەیان د مەدیایا جڤاکی دە کو بەحسا پەیوەندی و دلسۆزیا کوور یا ئۆجالان یا لگەل دەزگەھێن ئەولەھیێ یێن دەولەتێ دکن، گومان و نیقاشێن ل سەر رۆلا وی یا سیاسی کوورتر کرنە.

تەڤی ڤێ پلانا ھەڤکاریێ کو ئارمانجا وێ بێستاتوھشتن و حەلاندنا جڤاکا کوردە، ھشمەندیا گشتی یا گەلێ کورد بەر ب ھشیاریەکا نوو ڤە دچە. سیاسەتا کو ب دەھان سالان بوویە سەدەما قوربانیەک مەزن، ڤالاکرنا گوندان و بریندارکرنا نرخێن نەتەوەیی، رووبروویی رەخنەیێن توند دبە.

تێ چاڤەرێکرن کو جڤاکا کورد ب دەرباسکرنا ڤان لیستک و تەکتیکێن تاری، جارەکا دن ل سەر بنگەھا خەتەکا نەتەوەیی و دەمۆکراتیک خوە برێخستن بکە و خوەدی ل پاشەرۆژا خوە دەرکەڤە.