ئەمریکا دشێت زێدەتر لێبدەت و ئەوا ژ ژێرخانه‌یا سەربازی یا ئیرانێ مایی لاوازتر بکەت، لێ گەهشتییە وێ باوەریێ کو ئەو هێزا ئارمانجێ تێکددەت هەر دەم نەشێت ئەنجامێ سیاسی ژی ب دەست ڤە بینیت. مووشەک دشێت بنگەهەکێ سەربازی بێدەنگ بکەت لێ نەشێت دەولەتەکێ بێخیتە ژێر دەستێن خوە و نەشێت سیستەمەکێ سیاسی یێ نوو ل سەر کەلەخێ وێ ئاڤا بکەت.
ژ لایێ دی ڤه، ئیران ژی باش دزانیت کو نەشێت ئەمریکا ژ لایێ سەربازی ڤە ببەزینیت، له‌ورا هەول نادەت وێ د مەیدانا شەری دا بروخینیت بەلکو رێگریێ لێ دکەت کو بالادەستییا خوە بکەتە سەرکەڤتن.
ئیران ب لۆژیکێ پەکخستنێ شەری دکەت: گوشارێ دئێخیتە سەر ته‌نگئاڤا هورمز، نێگەرانیێ بەرەڤ دەریا سۆر بەرفرەهـ دکەت و گەفێ ل بنگەهـ و بەرژەوەندیێن ئابووری دکەت، دا کو تێچوونا سەرکەڤتنا ئەمریکی ژ شیانا واشنتۆن بەرزتر لێبکەت.
فەلسەفا ڤی شەری ل ڤێرێیە: ئەمریکا خودانا هێزا تێکدانێ یە، و ئیران خودانا جۆگرافیا ئالۆزکرنێ یە.
یا ئێکێ شەرەکێ کورت دڤێت دا رێکەفتنەکا درێژ بئافرینیت و یا دووێ ماندوکرنەکا درێژ دڤێت دا رێگریێ ل ژ دایکبوونا سەرکەڤتنەکا بلەز بکەت. د ناڤبەرا هەردویان دا رۆژهەلاتا ناڤین راوەستیایە، نە وەکی تەماشەڤانەک، بەلکو وەکی ئەو باجە یا کو هەردوو لایەن وەردگرن.
