ل باتمانێ د ئێریشەکا چەکداری دە رێڤەبەرەکی ئاک پارتیێ و دو کەسێن دن ھاتن کوشتن

د ئەنجاما ئێریشەکا چەکداری دە ل باژارێ باتمانێ، ئەندامێ رێڤەبەریا ناڤچەیێ یێ پارتیا داد و گەشەپێدانێ (ئاک پارتی) محەمەد دیرەک، کورێ وی و برازیێ وی ھاتن کوشتن.

ل گۆری نووچەیا رۆژنامەیا “جومھوریەت” یا ترکیەیێ، ئەڤ ئێریشا چەکداری ل گۆرستانا شارەداریێ یا ل تاخا گونەیکەنتێ پێک ھاتیە. کەس یان ژی کەسێن کو ناسنامەیا وان ھێژ نە دیارە، گولە ل محەمەد دیرەک، کورێ وی ئەرجان و برازیێ وی بەکر رەشاندنە. د ئەنجاما ئێریشێ دە، ھەر سێ کەسان ل جھێ بوویەرێ جانێ خوە ژ دەست دا.

پشتی روودانێ، ھێزێن پۆلیسان ل دەردۆرا گۆرستانێ تەدبیرێن بەرفرەھ یێن ئەولەھیێ گرتن و چوونوھاتنا ھەرێمێ سینۆردار کرن. ھەڤدەم، ژ بۆ ئەشکەرەکرنا سەدەما ڤێ بوویەرێ و دەستنیشانکرنا ناسنامەیا ئێریشکاران لێکۆلینەکا بەرفرەھ ھات دەستپێکرن.

ژ بۆ گرتنا تۆھمەتبارێن کو پشتی ئێریشێ ژ جھێ بوویەرێ رەڤیانە، خەباتێن لێگەرین و شۆپاندنێ یێن ھێزێن ئەمنیەتێ بەردەوامن. د ڤێ چارچۆڤەیێ دە، تۆمارێن کامیرایێن ئەولەھیێ یێن دەردۆرێ تێنە کۆنترۆلکرن و خەتا رەڤینا گومانباران تێ شۆپاندن.