تراژەدیا کو 12 سالن بەردەوام دکە: چارەنووسا ھەزاران ئێزدیان ھێژ نە دیارە

د سالڤەگەرا 12ێ یا کۆمکوژیا شنگالێ دە، برینا کوور یا کوردێن ئێزدی و داتایێن گران یێن ئەنجامێن ئێریشا داعشێ ب ھەموو گرانی و ترسا خوە ل ھۆلێ یە. ل گۆری ئامارا ھەری داوی یا ئۆفیسا رزگارکرنا رەڤاندیان، زێدەتری 2 ھەزار و 500 کەسێن ئێزدی ھێژ ژی وندا نە و چ ئاگاھی ل سەر قەدەرا وان نینن.

بەرپرسێ ئۆفیسا رزگارکرنا رەڤاندیان حوسێن قایدی کو سازیا وی گرێدایی سەرۆکاتیا ھەرێما کوردستانێیە، د داخویانیەکێ دە ڤەگوھاست کو د ئەنجاما ڤێ فەلاکەتا مرۆڤی دە نێزیکی 5 ھەزار کوردێن ئێزدی راستەراست ژ ئالیێ تەرۆریستێن داعشێ ڤە ھاتنە شەھیدکرن.

ئاگاھیێن کو ژ ئالیێ نەتەوەیێن یەکبوویی ڤە ژی ھاتنە ئەرێکرن نیشان ددن کو بەریا کارەساتا 3یێ تەباخا 2014ێ، نفووسا ئێزدیانا ل شنگالێ و دەردۆرا وێ نێزی 550 ھەزار کەسان بوو. ئیرۆ پشتی 12 سالان، نێزیکی 136 ھەزار ئێزدی هێژ ژی د ناڤ مەرجێن دژوارێن کامپان دە دژین و زێدەتری 189 ھەزار کەس ژی ل باژارێن جودایێن ھەرێما کوردستانێ ب جھ بوونە.

ل ھەرێما شنگالێ ھەتا نھا 93 گۆرێن بکۆم ھاتنە دیتن کو ژ ڤان گۆران جەنازەیێن 296 شەھیدان (41 ژن و 255 مێر) ھاتنە دەرخستن و رادەستی مالباتێن وان ھاتنە کرن. رایەداران دان زانین کو ھین ژی گەلەک گۆرێن بکۆم یێن نەھاتنە ڤەکرن ھەنە و د ھەمان دەمێ دە 68 پەرەستگەھ و جھێن پیرۆز یێن ئێزدیان د دەما داگیرکەریێ دە ھاتنە ھلوەشاندن.

د دەستپێکا ئێریشێ دە ب گشتی 6 ھەزار و 417 کوردێن ئێزدی (3.548 مێر و 2.869 ژن) ھاتن رەڤاندن. ب ھەولدانێن بەردەوام ھەتا نھا 3 ھەزار و 595 کەس (1.213 ژن، 339 مێر، 1.079 کەچ و 964 کور) ژ دەستێ تەرۆریستان ھاتنە رزگارکرن.

ھەتا ڤێ دەمێ چارەنووسا 2 ھەزار و 526 کەسان (1.215 ژن و 1.311 مێر) نەدیارە و خەباتێن سازیێن پێوەندیدارێن ژ بۆ دیتنا وان بەردەوام دکن.