کامپا مەخموورێ تێ داخستن و ئاکنجیێن وێ دێ ڤەگەرن
ل دووڤ پەژراندنا قانوونەکا گرێدایی پێڤاژۆیا ئاشتیێ ل پارلامەنتۆیا ترکیەیێ، بریارا گرتنا کامپا مەخموورێ ھات دان. د ناڤبەرا ئەنقەرە، بەغدا و ھەولێرێ دە لھەڤکرنەک چێ بوویە داکو 16 ھەزار وەلاتیێن ل ناڤ کامپێ ڤەگەرن و ئەڤ دۆسیە ب تەمامی بێ گرتن.
رۆژنامەیا “نەفەس” یا ترکی بەلاڤ کرییە کو پشتی پەژراندنا “قانوونا چارچۆڤەیی” ل پارلامەنتۆیێ، پێڤاژۆیا ڤالاکرنا کامپا مەخموورێ و چارەسەرکرنا دۆسیەیا ئەندامێن پهكهكێ دەست پێ دکە. ئەڤ قانوونا نوو، کو وەکی پێنگاڤەکە یەکئالیکەر تێ دیتن، رێیێ ل بەر ڤەگەرا 16 ھەزار وەلاتیێن ترکیەیێ، کو نھا د ناڤ کامپا مەخموورێ دە دژین، ڤەدکە.
ل گۆری وێ نووچەیێ، ئەڤ قانوون تەنێ ئاکنجیێن کامپا ناڤبۆری ڤەناگرە، د ههمان دەمێ دە ئەندامێن پهكهكێ ل چیایان و باسکێ ئەورۆپایێ یێ وێ رێخستنێ ژی ڤەدگرە. ھەروەسا ھاتییە دیارکرن کو د ناڤبەرا ئەنقەرە، حکوومەتا ئیراقێ و حکوومەتا ھەرێما کوردستانێ دە لھەڤکرنەکە تەمام ژ بۆ ڤەگەراندنا ئاکنجیێن وێ کامپێ چێ بوویە.
ھەروەسا راپۆرتەکە ھوور ژ بۆ سەرۆکاتیا کۆمارێ و وەزارەتێن پەیوەندیدار ژی ھاتیە پێشکێشکرن، کو تێ دە نەخشەرێیا ڤەگەراندن و تەڤلیکرنا سڤیلان د ناڤ جڤاکێ دە و شاندنا وەلاتیێن بیانی بۆ وەلاتێن وان ھاتیە دەستنیشانکرن.
ل سەر وان 2 ھەزار ئەندامێن پهكهكێ کو د ناڤ کامپێ دە نە، لێکۆلینێن ئەولەھیێ دێ بێن دەستپێکرن. ئەو کەسێن کو دخوازن ڤەگەرن و فەیدەیی ژ قانوونا نوو وەربگرن، پشتی قەداندنا پشکنینێن ئەولەھیێ، بریار دێ ل سەر دۆسیەیێن وان بێ دان، داکو ب تەمامی داوی ب ھەبوونا چەکداری و دۆسیەیا کامپا مەخموورێ بێ ئانین.
