نێچیرڤان بارزانی: دڤێت حکوومەتا فەدەرال پەیمانا شنگالێ ب جھ بینە
سەرۆکێ ھەرێما کوردستانێ نێچیرڤان بارزانی د سالڤەگەرا 12ێ یا جینۆساید و کۆمکوژیا کوردێن ئێزدی یا ل شنگالێ دە پەیامەک بەلاڤ کر. نێچیرڤان بارزانی دەستنیشان کر کو ئەرکا حکوومەتا فەدەرال یا ئیراقێیە کو ئەولەھی و ئاڤەدانیێ ژ بۆ شنگالێ ڤەگەرینە و گۆت: “ئەم دێ د ھەولدانێن خوەیێن ناڤنەتەوەیی دە بەردەوام بن ھەتا کو تاوانێن داعشێ ل سەر ئاستا جیھانێ ب تەڤاھی وەکی جینۆساید بێنە ناسکرن.”
د پەیاما سەرۆکێ ھەرێما کوردستانێ دە وھا ھات گۆتن:
“ئیرۆ ب خەم و ئێشەکە کوور ڤە، بیرانینا دوانزدەھ سالیا تاوانا جینۆساید و کۆمکوژیا وەلاتیێن مەیێن ئێزدی ب بیر تینن. د ڤێ بیرانینا ب ئێش دە، ئەم سەرێ رێز و حورمەتێ ل بەر گیانێ پاکێ شەھیدان دتەوینن و ب ھەموو رێز و وەفاداریێ وان ب بیر تینن.
تاوانا جینۆسایدا ئێزدیان، دیلگرتنا کەچ و ژنێن وان و وێرانکرنا مال و پەرەستگەھێن وان، برینەکا ڤەکری یا دل و دەروونا گەلێ کوردستانێیە. مخابن وەلاتیێن مەیێن ئێزدی پشتی دوانزدەھ سالان ژی ھێژ باجا ناکۆکیێن سیاسی و ھەبوونا ھێزێن چەکدارێن نەیاسایی ددن.
ژ ڤر ڤە ئەم تەکەز دکن کو ئەرکا حکوومەتا فەدەرال یا ئیراقێیە ئەولەھی و ئاڤەدانیێ ژ بۆ شنگالێ ڤەگەرینە، رێکەفتنا ئاساییکرنا رەوشا شنگالێ یا لگەل حکوومەتا ھەرێما کوردستانێ جیبجی بکە، کار ژ بۆ پارێزگەھبوونا وێ بکە و رێ بدە کو ھێزێن نەیاسایی ھەرێمێ ب جی بھێلن دا کو کۆچبەر ڤەگەرن سەر جھ و وارێن خوە.
ئەم وەلاتیێن خوەیێن ئێزدی پشتراست دکن ھەتا کو رەڤاندیەک ژی مابە، تیما نڤیسگەھا مە دێ ل سەر کارێن خوەیێن ژ بۆ رزگارکرن و ئەشکەرەکرنا چارەنووسا وان بەردەوام بە. ھەر وھا ئەم دێ د ھەولدانێن خوەیێن ناڤنەتەوەیی دە بەردەوام بن ھەتا کو تاوانێن داعشێ ل سەر ئاستا جیھانێ ب تەڤاھی وەکی جینۆساید بێنە ناسکرن.
د ڤێ بیرانینێ دە، ئەم سپاسی و رێزداریا خوەیا کوور پێشکێشی خەلکێ مێڤانپەروەرێ دھۆک و بەھدینانێ ب گشتی دکن کو د دەمێن دژوار دە دەریێ مال، دبستان و مزگەفتێن خوە ژ بۆ کۆچبەرێن ئێزدی ڤەکرن. ھەر وھا سپاسی و رێزداری ژ بۆ وان ھەموو وەلاتێن کو ئەڤ تاوان وەکی جینۆساید ناساندنە و ب ھەر شێوەیی ئالیکاریا ئێزدیان کرنە.
سلاڤ ل بەرخوەدانا جڤاکا ئێزدی، سلاڤ ژ بۆ گیانێ پاکێ شەھیدان و وان ھەموو پێشمەرگەیێن قەھرەمان یێن کو د وان رۆژێن دژوار دە ب فەرمانداریا جەنابێ سەرۆک مەسعوود بارزانی ئەفسانەیا داعشێ تێکشکاندن و جانێ خوە ژ بۆ ئازادکرنا شنگالێ و پاراستنا روومەتا نشتمان بەخشین.”
