مەسروور بارزانی د سالڤەگەرا کۆمکوژیا شەنگالێ دە: پێویستە پەیمانا شنگالێ بێ دەرەنگی بهێتە جێبەجێکرن
سەرۆکێ حکوومەتا ھەرێما کوردستانێ مەسروور بارزانی د مەراسیما سالڤەگەرا 12ێ یا جینۆسایدا کوردێن ئێزدی و کۆمکوژیا شنگالێ دە ئاخڤی و بال کشاند سەر بەردەوامیا ئازارێن ئێزدیان، دۆزا ڤەگەرا ئاوارەیان و ئاستەنگیێن ل سەر رێیا ئاڤاکرنا دادگەھەکا ناڤنەتەوەیی.
مەسروور بارزانی د دەستپێکا گۆتارا خوە دە بیرئانینا قوربانیێن ڤێ تاوانێ ب بیر ئانی و رۆلا پێشمەرگە و رێبەریا سەرۆک بارزانی د رزگارکرنا شنگالێ دە دەستنیشان کر. بارزانی دیار کر کو 100 رۆژان پشتی فەرمانا ئێریشێ، چیایێ شنگالێ و دەردۆرا وێ ب قوربانیدانا ب سەدان پێشمەرگەیان ھاتنە رزگارکرن، لێ ئەنجامێن گرانێن ڤێ تاوانێ ھەتا ئیرۆ ژی بەردەوام دکن.
د چارچۆڤەیا دۆسیایا رەڤاندیان و قوربانیان دە، سەرۆکێ حکوومەتێ بیلانچۆیا داوی ئەشکەرە کر و راگھاند کو ژ دەستپێکا تاوانێ ڤە ب ھەولدانێن بەردەوام زێدەتری 3.500 خوشک و برایێن ئێزدی ھاتنە رزگارکرن. لێ بەلێ بارزانی تەکەز کر کو ھین ژی زێدەتری 2.700 کەس وندا نە و چ ئاگاھی ل سەر چارەنووسا وان تونەیە، ژ بەر وێ ژی داخوازا ھەڤکاریا ناڤنەتەوەیی کر ژ بۆ دیتنا وان.
بارزانی سپاسیا خەلکێ کوردستانێ، ھێزێن ھەڤپەیمانان و ھەموو ئەو وەلات و رێخستنان کر کو د رۆژێن دژوار دە ئالیکاری پێشکێشی کۆچبەران کرنە. ھەر وھا بال کشاند سەر رەوشا گرانا زێدەتری 20 ھەزار مالباتێن ئێزدی یێن کو ھین ژی د ناڤ کامپان دە دژین و گۆت کو ئارمانجا وان یا سەرەکی ڤەگەرەکا سەربلندانەیە ژ بۆ ڤان کۆچبەران کو ڤەگەرن سەر جھ و وارێن خوە.
ل سەر ھەڤکاریا لگەل بەغدایێ، مەسروور بارزانی سپاسیا حکوومەتا ئیراقێ کر ژ بۆ خەباتێن ھەڤبەشێن د دیتنا گۆرێن بکۆم دە، لێ بانگ ل حکوومەتا فەدەرال کر کو ژ بۆ ئاساییکرنا رەوشا ئەولەھی و ئیداری یا شنگالێ پەیمانا شنگالێ ب جھ بینە. سەرۆکێ حکوومەتێ رەخنە ل ئاستەنگکرنا دامەزراندنا دادگەھەکا ناڤنەتەوەیی یا ژ بۆ تاوانێن داعشێ گرت و داخواز ژ جڤاکا ناڤدەولەتی کر کو ئالیکار بن دا کو ھەموو بەرپرسیارێن ڤێ جینۆسایدێ بگھێژن سزایێ خوە.
د داویا گۆتارا خوە دە، مەسروور بارزانی تەکەز کر کو تەرۆر چ دین و نەتەوەیان ناس ناکە و تەنێ ب رێیا دادپەروەری، وەکھەڤی و رێزگرتنا ل مافێن ھەموو باوەریان دکارە رێ ل بەر سەرھلدانا نوویا تەرۆرێ بێ گرتن. بارزانی بانگ ل ھەموو ئالیان کر کو بیرانینا ڤێ جینۆسایدێ نە تەنێ ببە مەراسیمەکا رۆژەکێ، بەلکی ببە سۆزەکا ھەڤبەش ژ بۆ دابینکرنا پاشەرۆژەکا ئەولە و سەربلند ژ بۆ ھەموو وەلاتیان.
