پەکەکە ل حەلەبجەیێ تونەلان دکۆلە
پەکەکە بجھکرنا ھێزێن خوە ل سەر سینۆرێ لگەل رۆژھلاتێ کوردستانێ ددۆمینە. چەکدارێن پەکەکێ، یێن کو ل نێزیکی ھندەک گوندێن حەلەبجەیێ کامپ ئاڤا کرنە، ناھێلن گوندی بکەڤن سەر ئەردێ خوە و ژێ دەرکەڤن.
ل گۆری ئاگاھیێن کو ژ ئالیێ نشتەجھێن ھەرێمی ڤە ھاتنە دایین، تێ راگھاندن کو پەکەکە ل سەرانسەرێ سینۆرێ کو ژ حەلەبجەیێ ھەتا رۆژھلاتێ کوردستانێ درێژ دبە، تونەل و بیران دکۆلە. تێ راگھاندن کو ھێزێن پەکەکێ د چارچۆڤەیا ئۆپەراسیۆنێن خوەیێن کۆلاندنا خەندەکان دە، ل سەر ئەردێ نێزیکی گوندێ بۆینێ ل حەلەبجەیێ تەقین پێک ئانینە و تونەل کۆلانە. گوندی دیار دکن کو چوونا وان بۆ سەر ئەردێن وان ژ ئالیێ چەکدارێن پەکەکێ ڤە دهێتە ئاستەنگکرن و کەتن و دەرکەتنا ژ گوند ژ ئالیێ ھێزێن پەکەکێ ڤە تێ کۆنترۆلکرن.
د ئاخافتنێن خوە دە، نشتەجھێن گوندێ بۆین بەحسا بھیستنا هەژمارەکا زۆر یا تەقینان ل ھەرێمێ کرن، نشتەجهان دەستنیشان کرن کو ئاخا وان بێ دەستوور تێ بکارئانین، و دیار کرن کو دەستوور نایێ دایین ئەو بگەهنە سەر ئەردێن خوە.
ل گۆری ئاگاھیێن کو ژ گوندیان ھاتنە وەرگرتن، د رەوشێن ئاسایی دە، ژ بۆ پاراستنا چاڤکانیێن ئاڤا بن ئەردی، ل ھەرێمێ کۆلانا بیران قەدەغەیە. پشتی گلی و گازندێن گوندیان، ئەفسەرێن پاراستنا ژینگەھێ یێن پێشمەرگەیان گھیشتن ھەرێمێ دا کو ھێزێن پەکەکێ ھشیار بکن. لێبەلێ، ل گۆری گوندیان، ئەندامێن پەکەکێ نەھشتن کو ھێزا پێشمەرگەیان بکەڤە ھەرێمێ.
د دەمێن داوی دە، گەلەک راپۆرت ژ ھەرێمێ دەرکەتنە ھۆلێ کو نیشان ددن پەکەکێ ھێزێن خوەیێن کو ژ ھەرێمێن رۆژئاڤا و بەھدینان ڤەکشاندبوون، ژ نوو ڤە ل ھەرێما سینۆرێ رۆژھەلات ب جھ کرنە. تێ راگھاندن کو پەکەکێ ئەڤ ھێز د بن ناڤێ پژاکێ دە ل ھەرێمێ ب جھ کرنە و ھەول ددە کو رەوشەکە مینا یا ل رۆژئاڤا دروست بکە. وەکی دن، تێ ئیدیعاکرن کو چەکدارێن پەکەکێ ل ھەرێمێن د بن کۆنترۆلا رێخستنێن دن یێن رۆژھەلات دە چالاکن.
