ئەحمەد شەرع و مەزلووم عەبدی ل شامێ جڤیان: پێڤاژۆیا ئەنتەگراسیۆنا ھەسەدێ ل سەر مێزە یە
سەرۆکێ سووریەیێ ئەحمەد شەرع ل قەسرا گەل یا ل پایتەختا شامێ، پێشوازی ل فەرماندارێ گشتی یێ ھێزێن سووریەیا دەمۆکراتیک (ھەسەدێ) مەزلووم عەبدی کر. ھەڤدیتن ب ئارمانجا شۆپاندنا گاڤێن کریارکی یێن تەڤلیکرنا ھێزێن لەشکەری و سازیێن رێڤەبەریا خوەسەر د ناڤ بنەسازیا فەرمی یا دەولەتێ دە پێک ھات.
ئاژانسا نووچەیان یا سووریەیێ راگھاند کو ئەڤ جڤینا ئاستبلند ب ئامادەبوونا وەزیرێ دەرڤەیێ سووریەیێ ئەسعەد شەیبانی و پارێزگارێ دێرازۆرێ زیاد عایش برێڤە چوو. د ھەڤدیتنێ دە خەباتێن دەربارێ جیبجیکرنا خالێن رێکەفتنا 29ێ چلەیێ کو د ناڤبەرا حکوومەتا ناڤەندی و ھەسەدێ دە ھاتبوو ئیمزاکرن، ب بەرفرەھی ھاتن نرخاندن.
ل گۆری زانیاریێن ئاژانسێ، د دانوستاندنان دە ئالیان تەکەزی ل سەر بلەزلەزکرنا پێڤاژۆیا ئەنتەگراسیۆنا یەکینەیێن لەشکەری و رێڤەبەریێن ھەرێمی د ناڤ سازیێن دەولەتێ دە کر. ھات دەستنیشانکرن کو مەبەستا ڤان پێنگاڤان مسۆگەرکرنا ئەولەھی، ئارامی و یەکتیا خاکێیە ل ھەمبەر مەترسیێن ل ھەرێمێ.
