پرۆژەقانوونا چارچۆڤەیێ دێ دەمیرتاش و یوکسەکداغ ئازاد بکە
پەرلەمەنتارەکە دەم پارتیێ ئەشکەرە دکە کو پرۆژەقانوونا چارچۆڤەیێ دۆسیەیا کۆبانێ ڤەدگرە و دێ ببە سەدەما ئازادکرنا سهلاحهددین دەمیرتاش و فیگەن یوکسەکداغ، ژ بەر کو بریارا دادگەھێ ل سەر دۆسیەیا وان ھێژ نەگھیشتیە قۆناغا داویێ.
پەرلەمەنتارا پارتیا وەکھەڤی و دەمۆکراسیا گەلان (دەم پارتی) مێرال دانیش بەشتاش د داخویانیەکێ دە راگھاند کو پرۆژەقانوونا چارچۆڤەیێ یا پرۆسەیا ئاشتیێ، کو پێشکێشی سەرۆکاتیا پارلەمەنتۆیا ترکیەیێ ھاتیە کرن و ژ 12 مادەیان پێک تێ، دۆسیەیا کۆبانێ ڤەدگرە و تو قەدەغەیەکە سیاسی یا نوو ژ بۆ سهلاحهددین دەمیرتاش و فیگەن یوکسەکداغ چێ ناکە.
بەشتاش ھەروەسا گۆت کو ل گۆری ناڤەرۆکا وێ پرۆژەقانوونێ، ئەڤ ھەر دو سەرکردە و جەزاکریێن دن یێن دۆسیەیا کۆبانێ د دەرڤەیی وێ جوداکرنێ دە نەیا کو قانوونێ دیار کریە؛ سەدەما وێ ژی بۆ وێ یەکێ ڤەدگەرە کو دۆسیەیێن وان ھێژ پلەیا داویێ وەرنەگرتیە و د قۆناغا پێداچوونێ دە نە.
وێ پەرلەمەنتارا دەم پارتیێ تەکەز ژی کر کو دادگەھا پێداچوونێ دکارە بەری یەکئالیکرنا تەمام یا دۆسیەیێ، بریارا ئازادکرنا وان دەرخینە و پشترە دادگەھا ناڤخوەیی بریارا پاشخستنا جەزایێ وان ل گۆری قانوونا نوو ژ بۆ وان ب جھ بینە.
پەرلەمەنتارا ناڤبۆری ل گەل ناڤئینانا دەمیرتاش و یوکسەکداغ وەکی رەھینەیێن سیاسی، تەکەز ژی کر کو دڤێ ل گۆری بریارێن دادگەھا مافێن مەرۆڤان یا ئەورۆپایێ بێیی دەرەنگکەتن بێن ئازادکرن.
دۆسیەیا کۆبانێ یەک ژ دیارترین دۆسیەیێن سیاسی یێن دیرۆکا ھەڤدەم یا ترکیەیێ یە و زێدەتر ژ 100 سیاسەتمەدارێن کورد تێ دە تێن دارزاندن. د ناڤ وان دە ھەڤسەرۆکێن بەرێ یێن پارتیا دەمۆکراتیکا گەلان (ههدهپێ) سهلاحهددین دەمیرتاش و فیگەن یوکسەکداغ ھەنە؛ ئەڤ ھەر دو سەرکردە ژ داویا سالا 2016ێ ڤە د زیندانێ دە نە.
د مەھا گولانێ دە، دادگەھا ترکیەیێ جەزایێ 42 سالێن زیندانیکرنێ ل سەر دەمیرتاش و 30 سالان ژی ل سەر یوکسەکداغ بری، بەلێ دۆسیە ھێژ د قۆناغا پێداچوونێ دە یە و بریارا داویێ وەرنەگرتیە.
پرۆژەقانوونا چارچۆڤەیێ ڤێ داویێ پێشکێشی پارلەمەنتۆیا ترکیەیێ ھاتیە کرن و رێیێ ددە پاشخستنا جەزایێ ھن ژ زیندانیان. تەڤی بریارێن دادگەھا مافێن مەرۆڤان یا ئەورۆپایێ ژ بۆ ئازادکرنا راستەراست یا دەمیرتاش، حکوومەتا ترکیەیێ ھەتا نھا ئامادە نینە وێ بریارێ ب جھ بینە.
