پارلامەنتەرێن دەم پارتیێ: یاسایا چارچۆڤەیێ گاڤا یەکەم یا دەمۆکراسیێیە
ل کۆمیسیۆنا دادێ یا مەجلسا مەزن یا نەتەوەیی یا ترکیەیێ، پشتی گۆتووبێژێن گەرم کو 18 دەمژمێران بەردەوام بوون، پرۆژەیاسایا چارچۆڤەیێ یا ب ناڤێ “خورتکرنا ھەڤگرتنا نەتەوەیی و یەکرێزیا جڤاکی” ھاتە پەژراندن. پارلامەنتەرێن پارتیا وەکھەڤی و دەمۆکراسیێ یا گەلان (دەم پارتی) بال کشاندن سەر گرنگیا دیرۆکی یا ڤێ گاڤێ و نرخاندنا “یەکەمین گاڤا دەمۆکراسیێ” ژ بۆ پێڤاژۆیێ کرن.
د جڤینا کۆمیسیۆنێ دە ل سەر ناڤێ دەم پارتیێ پارلامەنتەر زولکوف ئوچار، ئۆنور دوشونمەز و نەورۆز ئویسال ئاسلان ئاخڤتن. پارلامەنتەران دیتن، رەخنە و پێشنیازێن پارتیا خوە یێن دەربارێ ناڤەرۆک و پاشەرۆژا ڤێ یاسایێ دە گھاندن رایا گشتی.
پارلامەنتەر زولکوف ئوچار دەستنیشان کر کو ئەڤ پرۆژەیاسا د خالەکا گرینگ یا دیرۆکی دە ھاتیە ئامادەکرن. ئوچار ئانی زمان کو ئەڤ گاڤ ئەنجاما گھیشتنا تێکۆشینا ھەبوونێ یا گەلێ کورد و پێدڤیا دەولەتێ یا ژ بۆ گوھەرینێیە و گۆت: “ئەڤ مەتن، پابەندبوونا ئانینا ھەموو مافێن گەلێ کورد بۆ ناڤ چارچۆڤەیا یاسایێ یە. د ھەمان دەمێ دە، یەکەمین دەرەجکا وان دەرجکانە کو بەر ب خەیالا جڤاکەکێ دەمۆکراتیک ڤە دچن.”
پارلامەنتەر ئۆنور دوشونمەز بال کشاند سەر مەترسیێن د شیرۆڤەکرنا ناڤەرۆکا یاسایێ دە و ل سەر پێناسەیا “تاوانێن تەرۆرێ” ھشیاریێن یاسایی کرن. دوشونمەز دەستنیشان کر کو دڤێت کەسێن مافێن خوەیێن دەمۆکراتیک ب کار تینن نەبن قوربانی و گۆت: “دڤێت ئیفادەیا ‘تاوانێن تەرۆرێ’ بێتە گوھەرتن و ببە ‘تاوانێن تەرۆرێ یێن کو زۆری و توندووتژیێ دحەوینن’. گرنگیا ڤێ یاسایێ د وێ دە ڤەشارتییە کو رێ ل بەر پێنگاڤێن داھاتوو ڤەکە.”
پارلامەنتەر نەورۆز ئویسال ئاسلان ژی دیار کر کو د سەدسالا دویەمین یا کۆمارێ دە ئەڤ یاسا ژ بۆ بەشداریا کوردان یا د ناڤ سیستەما سیاسی و جڤاکی دە خوەدی رۆلە. ئاسلان تەکەز کر کو ئەڤ پێڤاژۆ تەنێ ژ “بێدەنگکرنا چەکان” پێک نایێ و پێناسەیا “ئاڤاکرن و سازکرنا ئاشتیێ” ل پێڤاژۆیێ کر.
دهێتە تەخمینکرن کو پرۆژەیاسایا چارچۆڤەیێ پشتی پەژراندنا د ئاست بلند یا کۆمیسیۆنێ دە، د رۆژێن پێش دە دەرباسی جڤاتا گشتی یا پەرلەمانێ ترکیێ ببە و بکەڤە رۆژەڤا دەنگدانێ.
