ل ئامەدێ ئۆپەراسیۆنا تاوانێن ئەلکترۆنی: 2 گومانبار ھاتن گرتن

ل پارێزگەھا ئامەدێ یا باکورێ کوردستانێ، د ئەنجاما ئۆپەراسیۆنەکا بەرفرەھ یا ل دژی گرووپەکێ تاوانێن ئەلکترۆنی دە 10 گومانبار ھاتن دەستەسەرکرن. دهێتە ئیدیعاکرن کو ڤان کەسان ب رێیا پلاتفۆرمێن دیجیتال زەخت و گەف ل مالباتێن زارۆکێن مری کرنە. پشتی کارووبارێن دادگەھێ، ژ ڤان گومانباران 2 کەس ھاتن گرتن.

تیمێن شاخا تێکۆشینا ل دژی تاوانێن ئەلکترۆنی یا برێڤەبریا ئەولەھیێ  یا ئامەدێ، پشتی تەسپیتکرنا چالاکیێن گرووپەکێ کو ناڤێن کۆدێن “C47” و “C99” ب کار تینن، دەست ب خەباتەکا تەکنیکی کر. د چارچۆڤەیا لێپرسینێ دە ھات دیارکرن کو گومانباران ب رێیا پانەلێن لێپرسینێ یێن نەیاسایی و گرووپێن گرتی، چالاکیێن زۆرداریا ئەلکترۆنی، گەف، ترساندن و عاجزکرن مەشاندنە.

د لێپرسینێ دە ھات تەسپیتکرن کو مالباتێن رۆژین کابایش، ھیرانور نیلگون ئایگار و کڤانچ ئومانێ، کو مرنا وان د رایا گشتی دە دەنگڤەدانەک مەزن هەبوو، د ناڤ ئارمانجێن سەرەکی یێن ڤێ گرووپێ دە نە. ھات راگھاندن کو گومانباران ئاگاھیێن کەسی یێن ژ سیستەمێن نەیاسایی ب دەست خستنە ب کار ئانینە و ب رێیا هەژمارێن تەلەفۆنێ یێن بیانی پەیامێن گەفێ ژ بۆ مالباتان شاندنە. د ناڤ کەسێن کو ھاتنە گەفکرن دە بابێ رۆژین کابایشێ، نیزامەدین کابایش ژی ھەیە.

ل سەر ڤان تەسپیتان، دەربارێ گومانباران دە ب تۆھمەتا “گەف”، “بدەستخستنا نەیاسایی یا ئاگاھیێن کەسی” و “دزینا بەلگەیێن ئەولەھیا دەولەتێ” دۆسیە ھات ڤەکرن. ب ناڤەندیا ئامەدێ ل 8 پارێزگەھان ئۆپەراسیۆنێن ھەمدەم ھاتن کرن و د ئەنجامێ دە 10 گومانبار ھاتن گرتن.

گومانبارێن کو پشتی لێپرسینا ل ئەولەھیێ رەوانەیی دادگەهێ ھاتن کرن، دەرکەتن پێشبەری دادوەری. دادگەھێ ژ بۆ 2 گومانباران بریارا گرتنێ دا، گومانبارێن دن ژی ب شەرتێ کۆنترۆلا دادی ھاتن سەربەستبەردان.