ل سەر داخوازا ئۆجالان کادرۆیێن ڤەقەتیایی یێن پەکەکێ ژ قانوونێ مفا وەرناگرن
ھوورگلیێن نوو یێن دەربارێ پرۆژەیاسایا چارچۆڤەیێ یا کو د رایا گشتی دە وەکی پرۆژەیا “ترکیەیا بێ تەرۆر” تێ ناسین و پێشکێشی پارلامەنتۆیێ ھاتبوو کرن، دەرکەتن ھۆلێ. ل گۆری خالا سینۆردارکرنا دەمی یا د پرۆژەیاسایێ دە، ئەڤ سەرەراستکرنا یاسایی ژ بۆ کەسێن کو بەری سالا 2005ێ ژ پەکەکێ ڤەقەتیانە، دەرباس نابیت.
د رەشنڤیسا پرۆژەیاسایێ دە ب ئاوایەکی زەلال ھاتیە دەستنیشانکرن کو قانوون کریار و کرنەکا بەری سالا 2005ێ ب خوە ڤە ناگریت. ئەڤ مەرج ب تایبەتی راستەراست باندۆرێ ل سەر وان بەرپرس و کادرۆیێن پایەبلند دکە کو د ئەنجاما ناکۆکیێن ناڤخوەیی یێن کۆنگرەیا 2004ێ دە ژ رێخستنێ ڤەقەتیا بوون.
سالا 2005ێ و رەوشا کادرۆیێن ڤەقەتیایی
وەکی کو تێ زانین، د کۆنگرەیا سالا 2004ێ یا پەکەکێ دە ناکۆکیەکا کوور یا ناڤخوەیی روو دابوو و د ئەنجامێ دە ب سەدان چەکدار و نێزیکی 15-20 کادرۆیێن ئاست بلند یێن رێڤەبەریێ ژ رێخستنێ ڤەقەتیا بوون. د ناڤ ڤان دە کەسایەتێن سەرەکی یێن کو ژ رێخستنێ ڤەقەتیان ئەڤ ناڤە ھەبوون:
نیزامەدین تاش (بۆتان): سەرۆکێ بەرێ یێ باسکێ لەشکەری و ئەندامێ کۆنسەیا سەرۆکاتیێ.
عۆسمان ئۆجالان: برایێ عەبدوللاھ ئۆجالان و ئەندامێ کۆنسەیا سەرۆکاتیێ.
کان یلماز: ئەندامێ کۆنسەیا سەرۆکاتیێ.
خەلیل ئاتاچ: ئەندامێ کۆمیتەیا ناڤەندی.
هدر یالچین: کادرۆیێ ناڤەندی.
حکمەت فیدان: کەسایەتێ کو د ئۆپۆزیسیۆنا ناڤخوەیی یا رێخستنێ دە جیھ گرتبوو.
سینۆرێ کو ژ بۆ سالا 2005ێ ھاتیە دانین رێ ل بەر ڤان کەس و کۆمێن بەرێ یێن ڤەقەتیایی دگرە کو ژ پێناس و پیڤانێن ڤێ قانوونێ مفا وەربگرن. ل گۆری نرخاندنێن سیاسی، ئەڤ خالا تایبەت کو تێ ئیشارەتکرن ل سەر داخوازا راستەراستا عەبدوللاھ ئۆجالان د مەتنێ دە جھ گرتیە، نیشان ددە کو ئەڤ سەرەراستکرنا یاسایی تەنێ ژ بۆ ئۆجالان، سەرۆکاتیا نھا و چەکدارێن کو نھا د ناڤ رێخستنێ دە چالاکن ھاتیە ئامادەکرن.
