پەسەکە: پرسا کورد نە مژارا تەرۆرێیە، پرسا ئازادیا نەتەوەیەکێیە
لژنەیا رێڤەبەریا ناڤەندی یا پارتیا سۆسیالیستا کوردستانێ (پەسەکێ) پشتی جڤینا خوەیا 11ێ تەباخا 2026ێ، ئەنجامنامەیەک وەشاند و ھەلوەستا خوەیا دەربارێ گەشەدانێن داوی دە راگھاند. پەسەکێ د داخویانیا خوە دە رەخنەیێن توند ل “یاسایا چارچۆڤە” گرتن کو د 10ێ تەباخێ دە ژ ئالیێ پارلامەنتۆیا ترکیەیێ ڤە ھاتبوو پەژراندن و دەستنیشان کر کو ئەڤ قانوون نیشانا بەردەوامیا زیھنیەتا ئینکارکەر و ئەولەھیپارێزا دەولەتێیە.
د داخویانیێ دە ھات دیارکرن کو “پێڤاژۆیا ترکیەیا بێ تەرۆر” ھەبوونا نەتەوەیی یا گەلێ کورد پاشگوھ دکە و ئارمانج دکە کو دۆزا کورد ب تەنێ بخە چارچۆڤەیا تەرۆرێ. پەسەکێ تەکەز کر کو قانوونا نوویا ژ بۆ پاشخستنا سزایێن ئەندامێن پەکەکێ یێن چەکان دەینن ھاتە ئامادەکرن، تەمەنێ پرسا کورد کو سەد سالییە ناس ناکە و فەرسەندێ نادە کو کەسێن چەکان دەینن ب ئاوایەکی ئازاد و ئەولە بەشداری ژیانا سیاسی ببن.
پەسەکێ بال کشاند سەر وێ یەکێ کو بێچەککرنا پەکەکێ پێنگاڤەکا ئەرێنییە، لێ بەلێ پرسا کورد ب تەنێ ب دانینا چەکان ژ ھۆلێ رانابە. د داخویانیێ دە ھات گۆتن کو ل ترکیەیێ پرسگرێکا ئازادیا نەتەوەیا کورد ھەیە و سەدەما بنگەھین یا قەیرانێن وەلات سیاسەتا ئاسیمیلاسیۆن و توندوتیژیێیە. ھات دەستنیشانکرن کو چارەسەریا ماییندە تەنێ د چارچۆڤەیا دەستوورەکێ فەدەرال دەیە کو ل سەر بنگەھا وەکھەڤی و ئازادیا کوردان ھاتبە ئاڤاکرن.
لژنەیا رێڤەبەریا ناڤەندی یا پەسەکێ د داویا داخویانیا خوە دە بانگا یەکیتیا نەتەوەیی کر. پەسەکێ بانگ ل ھەموو پارتی، سازی و رەوشەنبیرێن کورد کر کو ل دژی پۆلیتیکایێن ئینکارێ دەستێن خوە بدن ھەڤ و ژ بۆ پاشەرۆژا ئازاد و ب روومەت یا گەلێ کورد ھێزا خوە بکن یەک.
