پەدەکە-سە: سووریەیا پاشەرۆژێ دڤێت ل سەر بنگەھا ھەڤپاریا ھەموو پێکھاتەیان و فەدەرالیزمێ ئاڤا ببە
کۆمیتەیا ناڤەندی یا پارتیا دەمۆکراتا کوردستانێ – سووریا (پەدەکە-سێ) ئەنجامنامەیا جڤینا خوە یا کو رۆژا 12ێ تەباخا 2026ێ ل باژارێ قامشلۆیێ ھاتبوو لدارخستن راگھاند. د جڤینێ دە رەوشا سیاسی یا سووریەیێ، پێڤاژۆیا لھەڤھاتنێ یا ل ترکیەیێ و پاشەرۆژا گەلێ کورد ل ھەرێمێ ب فرەھی ھاتن نرخاندن.
پەدەکە-سێ د داخویانیا خوە دە بال کشاند سەر قانوونا نوویا پارلامەنتۆیا ترکیەیێ کو وەکی بەردەوامیا پرۆسەیا لھەڤھاتنا د ناڤبەرا ئەنقەرە و رێبەرێ پەکەکێ عەبدوللاھ ئۆجالان دە ھات پێناسەکرن. د جڤینێ دە ھات دەستنیشانکرن کو ئەڤ قانوون دێ باندۆرەکا راستەراست و ئەرێنی ل سەر پێڤاژۆیا ئەنتەگراسیۆنا ھێزێن سووریەیا دەمۆکراتیک (ھەسەدێ) و حکوومەتا سووریەیێ بکە.
د داخویانیێ دە ھەلوەستا دەستھلاتداریا نوو یا شامێ و بریارنامەیا سەرۆکاتیێ یا ھەژمار 13 یا سالا 2026ێ ھاتن ئەرێکرن. پەدەکە-سێ تەکەز کر کو ژ بۆ گارانتیکرنا مافێن رەوایێن گەلێ کورد، دڤێت ناڤەرۆکا ڤێ بریارنامەیێ د دەستوورا نوویا وەلات دە جھ بگرە و ھات گۆتن: “ژ بۆ ئاڤاکرنا سووریایەکا نوو، پێدڤی ب دیالۆگەکا بەردەوام و ھەماھەنگیا لگەل شامێ ھەیە کو مافێن کوردان وەک پێکھاتەیەکا رەسەن و ھەڤپاریەکا راستەقین د سیستەمێ دە مسۆگەر بکە.”
د بەشەکا دن یا داخویانیێ دە رۆلا پارتیا دەمۆکراتا کوردستانێ (پەدەکێ) و سەرۆک مەسعوود بارزانی یا د پشتگریکرنا دۆزا کورد دە ھات بلندنرخاندن. پەدەکە-سێ سەردانا داوی یا سەرۆکێ ھەرێما کوردستانێ نێچیرڤان بارزانی بۆ سووریایێ وەک “وەرچەرخانەکا دیرۆکی” ب ناڤ کر و دیار کر کو ھلدانا ئالایا کوردستانێ جارا یەکەم د پێشوازیا فەرمی یا ل شامێ دە دەستکەفتیەکێ گرینگە کو بالا حکوومەتا ناڤەندی زێدەتر کشاندیە سەر دۆزا کورد.
سەبارەت کارووبارێن ناڤخوەیی یێن کوردان، پەدەکە-سێ داخواز کر کو ئەنجوومەنا نشتمانی یا کوردی ل سووریەیێ (ئەنەکەسە) بێ خورتکرن، شێوازێ خەباتا وێ بێ نووژەنکرن و دیالۆگا ناڤخوەیی ژ بۆ پاراستنا بەرژەوەندیێن ستراتەژیک یێن ملەتێ کورد خورتتر ببە.
پەدەکە-سێ د ئەنجاما داخویانیا خوە دە دەستنیشان کر کو دڤێت سووریەیا پاشەرۆژێ دەولەتەکا دەمۆکراتیک، فەدەرال و پڕ رەنگ بت کو ل سەر بنگەھا ھەموەلاتیا وەکھەڤ و ھەڤپاریا ھەموو پێکھاتەیان، عەرەب، کورد، ترکمەن و سوریان-ئاشووری، ئاڤاببە.
