باکرھان: ئارمانجا مە ئەوە کو دەمیرتاش د کۆنگرەیا پاییزێ دە ئامادە بە

ھەڤسەرۆکێ گشتی یێ پارتیا وەکھەڤی و دەمۆکراسیێ یا گەلان (دەم پارتی) تونجەر باکرھان د بەرنامەیەکا تەلەڤیزیۆنێ دە دەربارێ “قانوونا چارچۆڤەیێ” و ئامادەکاریێن کۆنگرەیا مەزن یا پارتیا خوە دە داخویانیێن بالکێش دان. باکرھان راگھاند کو ئەو پلان دکن د پاییزێ دە کۆنگرەیا خوەیا مەزن پێک بینن و ئارمانجا وان یا سەرەکی ئەوە کو سەلاحەدین دەمیرتاش و سیاسەتمەدارێن دن ب ئاوایەکی فیزیکی د ڤێ کۆنگرەیێ دە ئامادە ببن.

باکرھان بال کشاند سەر باندۆرا قانوونا نوویا ل سەر گرتیان و دیار کر کو ڤێ قانوونێ راستەراست پەیوەندیێ ب 125 ھەزار دۆسیەیان هەیە. باکرھان دا زانین کو ژ ڤان دۆسیەیان زێدەتری 75 ھەزار لێپرسینێن ئەشکەرە و 50 ھەزار لێپرسینێن ڤەشارتی نە. ل گۆری زانیاریێن کو ھەڤسەرۆکێ گشتی یێ دەم پارتیێ پارڤە کرن، لگەل جیبجیکرنا قانوونێ د قۆناغا یەکەم دە دهێتە تەخمینکرن کو 3 ھەزار و 900 گرتی وەرن بەردان.

دەربارێ کەسێن کو ل دەرڤەیی چارچۆڤەیا ڤێ قانوونێ مانە دە، باکرھان ئەشکەرە کر کو نێزیکی 900 گرتیێن کو بەریا سالا 2005ێ ب سزایێ موئەبەد هاتنە سزادان و ب تاوانا کوشتنێ هاتنە تاوانبارکرن د ڤێ قۆناغا یەکەم دە مفا ژ ڤێ قانوونێ وەرناگرن. باکرھان تەکەز کر کو رەوشا ڤان گرتیان دێ د قۆناغا دویەم یا قانوونێ دە هێت دەستگرتن، لێ ژ بلی ڤان کەسان ھەموو دۆسیایێن دن د ناڤ چارچۆڤەیا قانوونێ دە جھ دگرن.

د بەردەوامیا ئاخافتنا خوە دە باکرھان دەربارێ ئامادەکاریێن سیاسی یێن پارتیا خوە دە گۆت: “ئەم پلان دکن کو د پاییزێ دە کۆنگرەیا خوەیا مەزن پێک بینن. ئارمانجا مە ئەوە کو برێز سەلاحەدین دەمیرتاش و گەلەک کادرۆ و سیاسەتمەدارێن مەیێن کو نھا ل دەرڤەیی وەلاتن، ب ئاوایەکی فیزیکی بەشداری ڤێ کۆنگرەیێ ببن.”