یەکتی چیە دێ چاوا ب سەربکەڤە؟؟؟
بووبێ ئەسەر
ھەگەر ب راستی ژی پارتیێن مە یێن کوردستانی دخوازن یان بخوازن، یەکتی و یەکرێزیا ناڤا مالا کورد ل باکورێ کوردستانێ پێک بهێت. پێویستە ھەمی ھێز و قاوەتا خوە ژ بۆ وێ یەکێ ب کار بینن. ھەلبەت ئەڤ ژ بۆنا پەرچێن دن ژی دەرباس دبت.
د کۆڤار و مالپەرێن خوە دە دڤێت بێ راوەستان ل سەر ڤێ مژارێ بهێتە نڤیسین. ھەگەر ب راستی یەکتی و یەکرێزیا کوردان دخوازن، دڤێت ھەمی پارتیێن کوردستانی، ئەندام و خەلکێ خوە د ڤێ دەربارێدە زانا بکن. گرینگی و پێویستیا وێ ژ بۆ ئەندام و خەلکێ راڤەبکن داکو ئەم ب سەر بکەڤین. ھەڤپەیڤین ل گەل سەرۆک و رێڤەبرێن پارتیان بهێت کرن کو ل سەر ڤێ بابەتێ نەرینا وان ژ بۆنا خەلکێ بهێت زانین.
دڤێت د ھەمی تەلەڤزیۆنێن وان دە مژارا یەکتیێ ببیتە سەرەکی. بەرنامەیێن وان ب پرانی دڤێت ئەڤر بت. ھەگەر ئەم ب راستی یەکتیێ دخوازین، دڤێت ژ بۆنا وێ ژی کار بهێت کرن. د بەرنامەیێن ڤان پارتیێن مە دە ھێژ من یەک بەرنامە کو ل سەر گرینگیا یەکتیێ ئامادە کربن، نەدیتنە.
دڤێت نەرین و دیتنێن رەوشەنبیر و نڤیسکاران بهێت زانین و بەلاڤ کرن کو ئەو د ڤێ دەربارێ دە، چ دبێژن و دخوازن. پێویستە کو ب بەرفرەھی ئەڤ مژارە بکەڤیتە ژیانا ئەندامێن پارتیان و گەلێ مە کو ئەو خوە و گەلێ خوە ژ بۆنا پێویستیەکا وەھا ئامادە بکن.
دەم دەما خەباتێن دەستووری و ئەشکەرەیە. لۆما دڤێت ئەم و مللەت ژی نەرین و دیتنا سەرۆک و رێبەران بزانین، فێر ببین کو ئەو چ دخوازن و ژ بۆنا یەکرێزی و یەکتیێ فکرا وان ب زەلالی و ئەشکەرەیی ژ ئالیێ گەل دە بێنە بەلاڤکرن.
د ئەنجاما خەباتەکا وەھا دە ئەم دێ ب ھەڤرا ژ بۆ ڤێ ئێشا سەد سالان، رێیا چارەسەریێ ببینین. لێ ھەگەر تەنێ ئەڤ مژارە و ب ئاوایەکی دزی د ناڤا پارتیێن سیاسی دە بهێت گۆتەبێژکرن، ب سەر ناکەڤیت. سەرکەتنا ڤێ ب دانوستاندنێن زەلال و ڤەکری دبت.
ئێدی ل پاش دەریان، ب خەباتێن دزی ئانگۆ ژ خەلکێ ڤەشارتی ئەڤ ئێش نایێ چارەسەرکرن. ژ بەر کو د پاش دەریان کی چ دبێژن نە دیارە. ل سەر تشتێن نە دیار ژی یەکتی پێک نایێ.
فەرمۆ بلا تەلەڤزینێن پارتیێن دبێژنە خوە ئەم کوردستانی نە، دەست ب ڤێ مژارێ بکن نەرین و دیتنا سەرۆک، رێبەر و مێڤانێن خوە د ڤان بەرنامەیان دە بەلاڤ بکن. نەرینا رەوشەنبیر و نڤیسکاران ژی بگرن. خەلکێ گوھداری بکن. کا ئەو چ دبێژن؟
مەسەلا یەکتیان ھەبوون و نەبوونا گەلێ مەیە. مەسەلەیەکا وەھا گرینگ ژی تەنێ و ب ئاوایەکی دزی د ناڤا دو پارتی یان چەند پارتیان دە نابت. پێویستە، ئەڤ مژارە وەھا بکەڤە ناڤا گەل کو ئەو ژی خوە تێدە ببینن.
کار و خەبات نە ب گۆتنێ، ب کرنێ دبت. ئەز ئامادە مە کو کیژان پارتیا مەیا کوردستانی تەنھا ل سەر ڤێ مژارێ ئیمکانەکا بێ دەستدرێژایی کارێ من بکن، ئامادە مە دەست ب بەرنامەیەکێ وەھا بکم.
ژ بەر کو ئەز و ئەم ھەمی دزانین کو ھەتا ئەم یەکرێزی و یەکتیا ناڤا مالا خوە پێک نەینن، ئەم نکارین خوە ئازاد بکین.
ژ بۆنا گەنگەشی و دانوستاندنەکا وەھا تەلەڤزیۆنێن باشوورێ کوردستانێ ژی دکارن و دڤێت ببن ئالیکار.
ب دەھان تەلەڤزیۆن ل باشوور ھەنە. ژ وان یەک، ھەفتێ رۆژەکێ دکارن ل سەر ڤێ مژارێ بەرنامەیەکێ ل دار بخن. ئەڤ مەسەلە نە تەنێ یا باکورێ کوردستانێ یە. ژ بۆنا کو ئەڤە مژارەکا سەرەکی یا ھەمی کوردانە، پێویستە ھەمی کورد ل گەل پارتیێن خوەیێن کوردستانی خوەدی ل ڤێ دەرکەڤن.
دە فەرمۆ و کەرەم بکن، بلا پارتیێن مە بەرێ تەلەڤزیۆن و مەدیایا خوە بدن ڤێ مژارێ. ئەڤ مژارە نەیا پارتیەکێ، یان پەرچەیەکێ یە.
وەکە سەیدایێ جەگەرخوین گۆتیە: “ھەتا ئەم نەبن یەک، ئەم دێ ھەرن یەک ب یەک”.
