شاندەیا ئیمرالیێ یا دەم پارتیێ ل ئەدیرنەیێ سەردانا دەمیرتاش و مزراکلی کر
شاندەیا ئیمرالیێ یا پارتیا وەکھەڤی و دەمۆکراسیێ یا گەلان (دەم پارتی) کو ژ پەرڤین بولدان و میتەد سانجار پێک دھات، ئیرۆ 15ێ تەباخێ ل گرتیگەھا ئەدیرنەیێ سەردانا ھەڤسەرۆکێ بەرێ یێ ھەدەپێ سەلاحەدین دەمیرتاش و شارەدارێ بەرێ یێ باژارێ مەزنێ دیاربەکرێ سەلچووک مزراکلی کر.
شاندەیێ پشتی ھەڤدیتنەکا درێژ داخویانیەکا نڤیسکی بەلاڤ کر و راگھاند کو دەمیرتاش و مزراکلی پەژراندنا “قانوونا چارچۆڤەیێ”یا ل مەجلسا ترکیەیێ وەکی گاڤەکا گرینگ دبینن. د داخویانیێ دە ھات دەستنیشانکرن کو ھەر دو سیاسەتمەدار پشتگریێ ددن ڤێ قانوونێ و بانگ ل ھەموو ئالیێن پەیوەندیدار دکن کو بەرپرسیاریێن خوەیێن ژ بۆ جیبجیکرنا وێ ب جھ بینن.
شاندەیا دەم پارتیێ د پەیاما خوە دە بال کشاند سەر رەوشا گرتیێن سیاسی و داخوازا ئازادکرنا وان یا لەزگین کر. د داخویانیێ دە وھا ھات گۆتن: “ھەڤالێن مە دڤێت یەک دەمژمێرێ ژی د گرتیگەھێ دە نەمینن. ئەڤ داخوازا دادێ و پێدڤیا پێڤاژۆیا نوویە. دڤێت ئەڤ بێدادیا ل ھەمبەری برێز دەمیرتاش و ھەڤالێن وی بهێت راستکرن. ئازادکرنا گرتیێن سیاسی دێ ئاشتی و دەمۆکراسیێ ل وەلات خورتر بکە.”
سەلاحەدین دەمیرتاش کو 10 سالن د گرتیگەھێ دەیە، د سیاسەتا دەمۆکراتیک دە خوەدی رۆلا کلیتە. رێڤەبەریا دەم پارتیێ بەریا نھا دابوو خویاکرن کو ئەو ل بەندا ئازادکرنا دەمیرتاشن دا کو ئەو بکاربە ب ئاوایەکی فیزیکی بەشداری کۆنگرەیا گشتی یا مەزن یا پارتیێ ببە کو تێ پلانکرن د وەرزێ پاییزێ دە بهێت لدارخستن.
