دادگەھا کەرکووکێ نوونەرێ جۆتکارێن کورد ل سەرگەرانێ سزا دا
دادگەھا تاوانان یا کەرکووکێ بریارا داویێ ل سەر یەک ژ گلینامەیێن ل دژی نوونەرێ جۆتکارێن کورد ل سەرگەرانێ محەمەد ئەمین دەرخست و ئەو ب یەک ملیۆن دینارێن ئیراقی سزا دا.
ل گۆری بەلگەنامەیەکا فەرمی یا دادگەھا تاوانان یا کەرکووکێ، کو ئیمزایا دادوەر ئەحمەد حەموود عەتیە ل سەر ھەیە و ئیرۆ یەکشەمبێ، 23یێ تەباخا 2026ێ دەرکەتیە، ھات دیار کرن کو دادگەھێ ل گۆری بەندا یەکێ یا مادەیا 229ێ ژ قانوونا سزادانێ یا ئیراقێ، بریارا سزادانا محەمەد ئەمین ب یەک ملیۆن دینارێن ئیراقی دا.
محەمەد ئەمین د داخویانیا خوە دە راگھاند: “دادگەھێ ل سەر گلینامەیا لەشکەرێ ب ناڤێ کەرار شاکر ئەز تۆمەتبار کرم و سزا ل سەر من بری، د دەمێ دە کو ئەز نھا ل بەندا گلینامەیا دویێ مە، کو ژ ئالیێ فەرمانداریا ئۆپەراسیۆنان ڤە ل دژی من ھاتیە تۆمارکرن.”
ئەڤ ژی د دەمەکێ دەیە کو محەمەد ئەمین د دەستپێکا بوویەرێ دە دو گلینامەیێن قانوونی ل دژی فەرماندارێ ئۆپەراسیۆنان و لەشکەرەکی ب ناڤێ “کەرار” تۆمار کرن، لێ دادگەھێ گلینامەیێن وی جەمداندن. ل بەرانبەری وێ یەکێ ژی، فەرماندارێ لەشکەری و لەشکەری دو گلینامە ل دژی وی جۆتکاری تۆمار کرنە و ھەتا نھا ئەو جۆتکار 28 جاران بانگی دادگەھێ ھاتیە کرن، بێیی کو ئالیێ تۆمەتبار جارەکێ ل بەرانبەر دادگەھێ ئامادە ببە، کو ئەڤ ژی بوویە سەدەم کو دادوەر روونشتنان پاش بخە.
ئەو بوویەر ڤەدگەرە رۆژا 17ێ سباتا 2025ێ، گاڤا کو ل گوندێ شەناخەیێ محەمەد ئەمین ل سەر تراکتۆرا خوە مژوولی کارێ چاندنیێ بوو. د وێ دەمێ دە، ھێزەکا ئارتێشا ئیراقێ رێ ل وی گرت و لەشکەرەکی ب ئاوایەکی کرێت ئەو ب ستووبەندا وی کشاند و سڤاکاتی ب وی کر.
