ئۆجالان وەکو سەرپەرەشتێ پێڤاژۆیا چەککرنا پەکەکێ هات دەستنیشانکرن
ژ بۆ تەییدکرنا دەستبەردانا ژ چەکان یا پەکەکێ، شۆپاندنا رادەستکرنا چەکان ژ بۆ ھێزێن ئەولەھیێ یێن ترکیەیێ و برێڤەبرنا پێڤاژۆیا ڤەگەرا چەکداران، میکانیزمەکا نوو کو ژ دو کۆمیتەیان پێک دهێت دهێت ئاڤاکرن. ل گۆری ئاگاھیێن ھاتنە وەرگرتن، کۆمیتەیا یەکەم و سەرەکی دێ ئیرۆ جڤینا خوەیا یەکەم ل دار بخە و ب ئاوایەکی فەرمی دەست ب خەباتێن خوە بکە.
ئاڤاھیا ڤێ سیستەمێ ل سەر بنگەھا دابەشکرنا دەستھلاتا بریارداریێ و خەباتا قادێ ھاتیە سازکرن. کۆمیتەیا یەکەم کو وەکی کۆمیتەیا بلند دهێت بناڤکرن، د بن سەرۆکاتیا جیگرێ سەرۆککۆمار جەودەت یلماز دە دهێتە دامەزراندن. د ناڤ ڤێ کۆمیتەیا بلند دە وەزیرێ دادوەریێ، وەزیرێ کارێن ھوندر، وەزیرێ کارێن دەرڤە، وەزیرێ پاراستنێ و سەرۆکێ رێخستنا ئیستیخباراتا نەتەوەیی (میت) ئیبراھیم کالن جھ دگرن. ماف و دەستھلاتا داوی یا گرتنا ھەموو بریاران ب تەڤاھی د دەستێ ڤێ کۆمیتەیا ئاستا بلند دەیە.
د بن ڤێ ئاڤاھیێ دە کۆمیتەیا دویەم دهێت ئاڤا کرن کو دێ راستەراست گرێدایی کۆمیتەیا بلند کار کت. د ڤێ کۆمیتەیێ دە کەسێن سڤیل جھ ناگرن و تەنێ بەرپرسێن پێوەندیدار تەڤلی دبن، کو د ڤێ چارچۆڤەیێ دە عەبدوللاھ ئۆجالان ژی د ئاستەک دویەمین دە وەکی سەرپەرەشتێ دەستبەردانا ژ چەکان دهێت دەستنیشانکرن. ئەرکێ ڤێ کۆمیتەیا دویەم تەنێ شۆپاندنا تەکنیکی، ئامادەکرنا راپۆران و پێشکێشکرنا پێشنیارانە ژ بۆ کۆمیتەیا بلند، و چ دەستھلاتەکا وێ یا دانا بریاران نینە.
