ئەنجوومەنا نیشتمانی یا کوردی ل سووریێ (ئەنەکەسێ)، ب داخویانیەکا فەرمی پێشوازی ل بریارا وەزارەتا دەرڤەیا ئامەریکایێ یا دەربارێ دەرخستنا ناڤێ سووریەیێ ژ لیستەیا “دەولەتێن پشتگرا تەرۆرێ” کر. ئەنەکەسێ ئەڤ بریارە وەکی دەرفەتەکا دیرۆکی و گرنگ ژ بۆ باشبوونا ئابۆری، سیاسی و پەیداکرنا چارەسەریەکا بەرفرەھ ژ بۆ قەیرانێن وەلاتی ب ناڤ کر.
سەکرەتەریا گشتی یا ئەنەکەسێ د داخویانیا خوە دە دەستنیشان کر کو سڤککرنا دۆرپێچان و ڤەکرنا دەریێن دوبارە ئاڤاکرنا وەلاتی دێ راستەراست باندۆرێ ل رەوشا ژیانی و خزمەتگوزاریێ یا وەلاتیان بکە. لێ بەلێ ئەنەکەسێ تەکەز کر کو ژ بۆ سوودگرتنا ژ ڤێ گاڤێ، دڤێت پێڤاژۆیا سیاسی بەر ب ئاڤاکرنا دەولەتەکا دەمۆکراتیک، نەناڤەندی و خوەدی سەروەریا قانوونێ ڤە بچە و مافێن نەتەوەیی یێن گەلێ کورد و ھەموو پێکھاتەیان د دەستوورێ دە ل سەر بنگەھا وەکھەڤی و ھەڤبەشیا نیشتمانی وەرن گارانتیکرن.
د بەشەکا دن یا داخویانیێ دە، ئەنەکەسێ بانگ کر کو مەرجێن گونجایی ژ بۆ ڤەگەرا ئەولە، بروومەت و دلداری یا پەنابەر و کۆچبەران ب تایبەتی کۆچبەرێن سەرێ کانیێ و گرێ سپی بهێن ئامادەکرن. د داویێ دە ھات راگھاندن کو ژ بۆ پێکانینا ئارامی و گەشەپێدانێ، دڤێت تێکۆشینا ل دژی تەرۆر و توندرەویێ بەردەوام بکە و سازیێن نیشتمانی یێن گشتگر بهێن ئاڤاکرن.
