بەردەڤکێ ئاک پارتیێ عۆمەر چەلیک دەربارێ پێشھاتێن داوی یێن ل سووریەیێ و بریارا هلوەشاندنا ھێزێن سووریەیا دەمۆکراتیک (ھەسەدێ) دە داخویانیەکا گرینگ دا. چەلیک دەستنیشان کر کو لگەل هلوەشاندنا ھەسەدێ ژ بۆ خورتکرنا یەکرێزی و یەکپارچەییا ناڤخوە یا سووریەیێ قۆناغەکا گەلەک گرینگ ھاتیە دەرباسکرن و تەکەز کر کو ئەو پشتگریا سەروەری و پاشەرۆژا یەکگرتی یا وی وەلاتی دکن.
عۆمەر چەلیک ل سەر حەسابا خوە یا تۆرا جڤاکی راگھاند کو سەرۆککۆمارێ ترکیەیێ رەجەپ تەییب ئەردۆگان د سەردەمێن ھەری دژوار دە ژ بۆ پاراستنا مللەتێ سووریەیێ یا ل دژی تەرۆر و ئێرشێن داگیرکەران تێکۆشینەکا مەزن دایە. چەلیک بال کشاند ل سەر نەخشەرێیا نوو و دیار کر کو گاڤێن گشتگیر یێن برێڤەبریا شامێ دھێلن سووریە ژ تاریتیێ رزگار ببە و بەر ب پاشەرۆژەکا ساخلەم ڤە بمەشە.
وەکی دن، بەردەڤکێ ئاک پارتیێ دەستنیشان کر کو ئارمانجێن وان یێن “ترکیەیا بێتەرۆر” و “ھەرێما بێتەرۆر” پلانێن پارچەکرنا ھەرێمێ پووچ دکن و ئەڤ ئیرادە ژ بۆ گەلێ کورد یێ ل ھەرێمێ ژی نیشانەیا پاشەرۆژەکا رۆنە.
ئەڤ داخویانی پشتی وێ یەکێ ھات کو فەرماندارێ گشتی یێ ھەسەدێ مەزلووم عەبدی ل شامێ راگھاندبوو کو ھەسەدە وەکی ھێزەکا لەشکەری یا سەربخوە ھاتیە هلوەشاندن و تەڤلی ئارتێشا سووریەیێ بوویە.
