تەڤلیھەڤکرن و فەسخکرنا ھێزێن سووریەیا دەمۆکراتیک (ھەسەدێ) د ناڤا ئارتێشا سووریەیێ دە، نە تەنێ گوھەرینەکا لەشکەرییە؛ د ھەمان دەمێ دە خالا داوی یا وان رێزە سیاسەتێن شاش و بسەرنەکەتییە کو ب سالانە پەکەکە ل سەر پشتا گەلێ کورد دمەشینە. ھێزەکا کو ب سالان ریکلامێن وێ دھاتن کرن و وەکی “ئارتێشا رۆژئاڤا” دھات نیشاندان، د رۆژەکێ دە ب داخویانیەکێ داوی ل ھەبوونا خوە ئانی و تەسلیمی ھەمان رەژیما شامێ بوو کو ب بێئەخلاقی مافێن بنگەھین یێن کوردان بنپێ دکرن.
تشتا ھەری خەمگین و سەیر د ڤێ پێڤاژۆیێ دە ھەلوەستا ئالیگر و پرۆپاگانداچیێن پەکەکێ/پەیەدێ یە. د شوونا کو ل بەرامبەری ڤێ ئەنجامێ راوەستن، خەلەتیان بپەرچقینن و رەخنەیێن توند ل ڤێ بسەرنەکەتنا دیرۆکی بگرن، ئەو رابوونە ڤێ پاشڤەکشین و فەسخکرنێ وەکی “سەرکەفتنەکا ستراتەژیک” و “پێنگاڤەکا دیرۆکی” نیشانی جڤاکێ ددن. ئالیگرێن پەکەکێ کو ھەتا دوھ دگۆت “ئەم دێ نەناڤەندیبوونێ و خوەسەریێ بپارێزین”، ئیرۆ تەسلیمبوونا بێشەرت و مەرج یا ژ بۆ ناڤەندپارێزیا شامێ وەکی دەستکەفتی دفرۆشن گەلێ کورد.
ڤێ ئەنجامێ جارەکا دن نیشان دا کو خەتا سیاسی یا کو بنگەھا خوە ژ فەرمان و ئایدۆلۆژیا عەبدوللاھ ئۆجالان وەردگرە، چاوا ل قادێ راستی شکەستنێ تێ. نێزیکاتیێن تەئۆریک یێن بێ بنگەھ و گوھەرینا بەردەوام یا داخوازان، ھشت کو دەستکەفتیێن رەوایێن گەلێ کورد د بازارێن سیاسی دە بهێن وەندا کرن. سیاسەتێن شاش یێن ناڤەندی کو ل سەر بریارێن یەکدەستی دھاتن مەشاندن، ھەموو فەرسەندێن دیرۆکی یێن ل رۆژئاڤایێ کوردستانێ یەک ب یەک پووچ کرن.
مخابن، باجا ھەری گران یا ڤێ تابلۆیا سیاسی دیسا ژ ئالیێ جوانێن کورد ڤە ھات دان. ب ھەزاران جوانێن کو ب داخوازا پاراستنا ئاخ و ناسنامەیا خوە تەڤلی ڤێ پێڤاژۆیێ بوون، بوونە قوربانیێن حەسابێن شاش و سیاسەتا کۆلەدار یا پەکەکێ. ئیرۆ گاڤا مرۆڤ ل بەرھەم و ئەنجاما ڤان ھەموو سالان دنێرە، ئەڤ پرسیار سەرهلددە: گەلۆ ئەڤ ھەموو بەدەل و قوربانیێن ئەوقاس مەزن ژ بۆ وێ یەکێ بوون کو د داویێ دە چەک رادەستی رەژیمێ بهێن کرن و تەڤلی ھەمان ئارتێشێ ببن؟ ئەڤ بنکەتنا کو ئیرۆ وەکی نووچەیەکا ئاسایی و سەرکەفتنەکە دیرۆکی تێ نخوماندن، ئەنجاما راستەراست یا شاشیێن مەزن یێن رێڤەبرێ ڤێ فکرێ ئانکو عەڤدللا ئۆجالانە.
کورد گەر دخوازن بگهیژن مافێن خوە، دڤێت دەملدەست دەست ژ خەتا ئۆجالان یا تەسلیمیەتێ بەردن و دەست ب خەباتەکا سیاسی و چەکداری یا سەردەم لێ ب تامەکا نەتەوی بکن، تشتا کو دێ کوردان ژ دەست داگیرکەران بپارێزە ب تەنێ دەولەتەکا سەربخوەیە، نە چ تشتەک دن.
