مستەفا ئۆزچەلیک جارەکا دن وەک سەرۆکێ گشتی یێ پارتیا وەلاتپارێزێن کوردستانێ ھات ھلبژارتن
پارتیا وەلاتپارێزێن کوردستانێ (PWK) ل باژارێ دیاربەکرێ 2یەمین کۆنگرەیا خوەیا گشتی لدار خست. د کۆنگرەیێ دە مستەفا ئۆزچەلیک ب یەکدەنگی جارەکا دن وەکی سەرۆکێ گشتی یێ PWKێ ھات ھلبژارتن.
پارتیا وەلاتپارێزێن کوردستانێ (PWK) ئیرۆ 31ێ تەباخا 2026ێ د داخویانیەکێ دە راگھاند، PWKێ کۆنگرەیا خوەیا دویەمین دوھ 30ی تەباخێ ل دیاربەکرێ ل دار خست.
ژ بەر وەفاتا سییاسەتمەدار و کەدکارێ دۆزا ئازادیا کوردستانێ مەھدی زانا، د بەرنامەیا کۆنگرەیێ دە ھندەک گوھەرتن ھاتن کرن. ژ بەر کو مەراسیما جنازەیێ مەھدی زانا د ھەمان دەمێ دە بوو، گەلەک نوونەرێن سازیێن سڤیل، سییاسەتمەدار و دەزگەھێن مەدیایێ نەکارین د دەمژمێرێن دەستپێکێ دە بەشداری کۆنگرەیێ ببن.
جیگرێ سەرۆکێ گشتی یێ PWKێ محەمەد جان ئازبای، کو ھەڤالێ مەھدی زانایێ بوو د زیندانا دیاربەکرێ دە، د مەراسیما جەنازەییێ دە ل بەر شارەداریا ئامەدێ ئاخافتنەک کر. پشتی بداویبوونا مەراسیمێ، مێڤان ڤەگەریان جھێ کۆنگرەیێ و بەشا دویەمین یا بەرنامەیێ بەردەوام کر.
سەرۆکێ گشتی مستەفا ئۆزچەلیک د دەستپێکا بەشا دویەمین دە ل سەر رەوشا سییاسی یا رۆژەڤێ و نێرینێن PWKێ ئاخافتنەکا بەرفرەھ کر. کۆنگرە بوو قادا ھەڤگرتنا نەتەوەیی؛ ژ ھەر چار پەرچەیێن کوردستانێ پارتی و تەڤگەرێن سییاسی بەشدار بوون یان ژی پەیامێن پشتگریێ شاندن.
د بەشا پشتی نیڤرۆ دە، کو تەنێ ب بەشداریا ئەندامان برێڤە چوو، ھلبژارتن ھاتە کرن. مستەفا ئۆزچەلیک ب یەکدەنگی جارەکە دن وەکی سەرۆکێ گشتی یێ PWK ھات ھلبژارتن. ھەروھا مەجلیسا پارتییێ یا نوو ژی ھاتە دیارکرن کو تێ دە جھ گرتنا جوانان بال کشاند.
