ل ناڤچەیا قۆسەرێ یا سەر ب پارێزگەھا مێردینێ ڤە، دۆزەکا دادگەھێ ل دژی 11 رێڤەبەر، ئەندام و ئالیگرێن پارتیا وەلاتپارێزێن کوردستانێ (PWK) ھاتە ڤەکرن. سەدەما ڤێ دۆزێ ڤەدگەرە چالاکیەکا سیاسی یا کو ژ بۆ پیرۆزکرنا رۆژا ئالایێ کوردستانێ ھاتبوو رێکخستن.
دەستوەردانا پۆلیسان و پێڤاژۆیا بوویەرێ
ل گۆری ئاگاھیێن کو ژ داخویانیا فەرمی یا نڤێسینگەها راگەھاندنێ یا پارتییا وەلاتپارێزێن کوردستانێ ھاتنە وەرگرتن، بوویەر د 17ێ کانوونا 2025ێ دە روو دابوو. د وێ دیرۆکێ دە تەشکیلاتا پارتیێ یا مێردینێ خوەستبوو ل بەر ئاڤاھیا خوە یا ل قۆسەرێ ب داخویانیەکا چاپەمەنیێ رۆژا ئالایێ کوردستانێ پیرۆز بکە. د دەما چالاکیێ دە ھێزێن ئەولەھیێ خوەستبوون دەست دەینن سەر ئالایان و رێ ل بەر داخویانیێ بگرن؛ لێ بەلێ بەشدارێن چالاکیێ ل بەر خوە دابوون، ئالایێن خوە تەسلیم نەکربوون و پەیاما خوە خوەندبوون.
ئیدیعایا دۆزگەریێ و بانگا پشتگریێ
دۆزگەریا کۆمارێ یا قۆسەرێ ل ھەمبەر ڤان 11 کەسان سکالا ئامادە کر. د سکالایێ دە ناڤێ ئالایێ کوردستانێ یان ژی ناڤەرۆکا پیرۆزباھیێ نەھاتیە بەحسکرن؛ د جھێ وێ دە تەوانا “گرتنا رێ و ئاستەنگکرنا ترافیکێ” ل سەر بەشداران ھاتیە بارکرن.
یەکەم روونشتنا ڤێ دادگەھکرنێ دێ رۆژا سێشەمێ، 15ێ ئیلۆنا 2026ێ، دەمژمێر د 9:30ێ دە ل دادگەھا قۆسەرێ بە. پارتییا وەلاتپارێزێن کوردستانێ دیار کر کو ئەندامێن وان دێ ل سالۆنا دادگەھێ تەوانباریێن دۆزگەریێ رەد بکن و خوەدی ل نرخێن سەمبۆلیک یێن کوردستانێ دەرکەڤن. پارتیێ بانگ ل ھەموو ئالیێن سیاسی، سازیێن جڤاکی و گەلێ مێردینێ کر کو د رۆژا دادگەھکرنێ دە ئامادە بن و پشتگریێ بدن ڤان کەسان.
