دڤێره دا ئێك ژ ئارێشهیێن زۆر کویر د ئەزموونا پهكهكێ دا دیار دبیت. پهكهكه بۆ بەرهنگاربوونا ئینکارکرنا دەولەتا تورکیا ب بوونا گەلێ کورد ئاڤا بوو، لێ هەردەم بیاڤهكێ وەسا ئاڤا نەکر کو رێ ب فرەهییا ئیرادهیێن كوردی بدەت.
ژێدەرێن مافپەروەری و ئهكادیمی پێشبینی دکەن کو پشکەک ژ شەرێن وێ یێن دەستپێکێ دژی رێکخستنێن كوردی و چەپرەو یێن هەڤرک بوون، و وێ ب پلەپلە هەول دا دەستهەلاتا خۆ ب سەر نوێنەرایەتییا سیاسی یا كوردی دا بسهپینیت ئو هۆسا جوداهییەکا دیرۆکی پەیدا بوو:
بزاڤەکا بەرهنگارییا قۆرخکرنا دەولەتێ کر بۆ پێناسەکرنا ناسنامەیێ، لێ د ناڤا خۆ دا قۆرخکارییەکا دی بۆ پێناسەکرنا نیشتمانپهروەریێ ئاڤا کر. ئهو کەس یان لایهنێ پابەند ب هێلا پهكهكێ با ب شۆرشگێر دهاتە ههژمارتن و ئهو لایهن یان کەسێ جودا با دگەل پهكهكێ دبوو پاشڤەرۆ یان سیخۆر یان ژی ئامرازەک د دەستێ هێزێن دەرەکی دا.
مرۆڤێ کورد ئیدی ب وەفادارییا وی بۆ دۆزا گەلێ خۆ نەدهاتە پێڤان ل دهڤ پهكهكێ، بەلكو ب رادەیا نێزیکبوونا وی ژ هزرا ئۆجالانی و سەرکردایەتییا رێکخستنێ دهاته پیڤان.
ئەڤ هزره درێژه پێدا و ئینا ل ناڤ باشوورێ کوردستانێ ژی. ل شوینا کو دگەل پارتی دیمۆکراتی کوردستان و ئێکەتییا نیشتمانی ب وێنەیێ دو دەربرینێن دیرۆکی یێن جڤاکەکێ کورد کو بارودۆخ و ئەزموونا خۆ هەیە رەفتار بهێتە کرن، پهكهكه دگەل وان کەفتە د ناڤ پێکدادانێن سیاسی و سەربازی دا، نەمازە د سالێن نۆتان دا.
ئاماژەکرن بۆ ڤان پێکدادانان ب واتایا پاقژکرنا شاشییان نینە و نە ژی ڤەگوهاستنا رەخنهیێ یە بۆ بەرگرییەکا حزبی یا بەرهەڤکاری. هەمی حزبێن كوردی ژێر پرسیارکرنێ نە.
لێ مەترسی وى دەمى دەست پێ دکەت دەما حزب تەنێ ب هەڤرکییا ئەڤێن دی رازی نابیت، بەلکو شەرعییەتا وان یا نەتەوەیی ژێ دستینیت و ئایدۆلۆژییا خۆ دکەتە تاكە پیڤەر بۆ بریاردانێ ل سەر نشتیمانپهروەرییا وان.
ئەڤ دژایەتییە ب روهنی د کۆمبوونا ئۆجالانی دا دگەل سەرکردایەتیا قەندیل دیار دبیت. ئهو پرۆژەیێ بارزانی ب پرۆژەیەکێ نەتەوەیی-دەولەتی و نێزیک ژ «ئیمارەتێ» وەسف دکەت و تۆمەتبار دکەت ب پەیوەندیداربوون ب پرۆژەیێن بەریتانی و ئیسرائیلی، پاشان بانگا پارتی و ئێكهتیێ و هێزێن دی دکەت بۆ ئاڤاکرنا ئێکەتییا كوردی یا دیمۆکراتیک.
لێ ئەڤە چ ئێکەتییە ئەگەر پهكهكه بەری نوکە چ لایهنێن دى قهبولنهكربیت، پرۆژەیێ لایەنێ دی شەرمەزار کربیت و مافێ پێناسەکرنا نەتەوەیی درست دابیتە خۆ؟
ئهو ئێکەتییا ل ژێر مەرجەعییەتا ئێک لایەن بهێتە ئاڤاکرن نەئێکەتییا نەتەوەیی یە، بەلکو بهرفرههكرنا دەستهەلاتا وی لایەنی یە. ئێکەتی ب واتایا وێ نینە کو کەسێن جودا د ناڤ پروسیەکا ئێکگرتی دا بهێنه تواندن، بەلکو ب واتایا وێ یە کو دانپێدانێ بکەن کو نەتەوە بەرفرههتره ژ حزبێن وان و جوداهی د تێگەهشتنا دەولەتێ، فیدرالیەتێ یا ژی تێکهەلبوونێ دا، خودانێ خۆ ناکەتە دژمنێ گەلی.
پاشان پێڤەرەکێ پێدڤی ب پرسیارکرنێ یە:
بۆچی داخوازییا كوردی بۆ دەولەتێ ب نەتەوەییا پاشکەفتی یا ژی پرۆژەیێ ئیمارەتێ دەهێتە وەسفکرن، د دەمەک دا تێکهەلبوونا وان د ناڤ کۆمارا تورکیا دا ب گەشەکرنا هزرى دهێتە پێشكەشکرن؟
بۆچی پەیوەندیێن نێڤدەولەتی یێن حزبێن دی یێن كوردی دبنە پاشکۆبوون بۆ دەرڤە، د دەمەک دا پەیوەندیێن هەرێمی و نێڤدەولەتی یێن پهكهكێ ب پێدڤیێن شۆرشێ دهێنە تێگەهشتن؟
نەتەوە نە حزبەکا بهرفرههكرییه و نیشتمانپهروەری نەباوەرنامەیەکە سەرکردایەتی بدەتە وان کەسێن هەڤرا بن دگەل پهكهكێ و ژوان كهسان وهرگریت یێن وهك پهكهكێ هزر نهكهن.
حزب قۆناغەکن د دیرۆکا نەتەوەیی دا، هندەک راست دچن و هەندەک شاش دبن، هندەک بلند دبن و هەندەک ب دوماهی دهێن، د دەمەک دا کو گەل خودانێ مافێ رهسهن دمینیت.
لەوما ئێکەتیا كوردی ب بەستنا کۆنگرەیەکێ نوی دەست پێ ناکەت، بەلکو ب شۆرشەکا هزرى د ناڤ هەمی حزبان دا: کو هەر رێکخستنەک براوەستیت ژ پێشکەشکرنا خۆ وەکی نیشتمان و جهێ خویێ یا راستەقینە قەبوول بکەت وەکی دەنگەک ژ دەنگێن نەتەوەیێ. ئهو حزبا ژ گەلی مەزنتر لێ بهێت ئازادیێ بجهنائینیت بەلکو وەسیەتەکێ ب وەسیەتەکا دی دگوهۆریت.
