ئەنکسێ کوشتنا جوانەکی کورد شەرمەزار کر و داخوازا پێداچوونێ د بریارێن ئابۆری دە کر
ئەنجوومەنا نیشتمانی یا کورد ل سووریەیێ (ئەنەکەسێ) د داخویانیەکا فەرمی دە رەوشا ئابۆری و ئەولەھیێ یا داوی ل ھەرێمێ نرخاند. ئەنەکەسێ ژ حکوومەتا سووریەیێ داخواز کر کو بریارا زێدەکرنا نرخێ سۆتەمەنیێ ھلوەشینە، مافێن دارایی یێن جۆتکاران بدە و تاوانا کوشتنا جوانەکی کورد ب توندی شەرمەزار کر.
د داخویانیا کو رۆژا یەکشەمێ (13ێ ئیلۆنا 2026ێ) ھات بەلاڤکرن دە ھات دیار کرن کو تەڤی بەرفەرەھبوونا پەیوەندیێن ناڤدەولەتی و راکرنا سزایان پشتی کەتنا رێژیمێ، ئەڤ گەشەدان ھەتا نھا ب ئاوایەکی ئەرێنی ل سەر ژیانا رۆژانەیا وەلاتیان خویا نەبوونە.
“زەختا ئابۆری بارگرانیێ دخینە سەر وەلاتیان”
ئەنەکەسێ بال کشاند سەر بریارێن داوی یێن حکوومەتێ یێن دەربارێ بلندکرنا نرخێ سۆتەمەنیێ و دەرەنگکەتنا سێ مەھان د دانا دراڤێ جۆتکاران دە و راگھاند کو ئەڤ گاڤ بارگرانیەکا مەزن تێخە سەر ملێ خەلکێ. د داخویانیێ دە بانگ ل حکوومەتێ ھات کرن کو پشتگریا کەرتا چاندنیێ بکە، نرخێ سۆتەمەنیێ داخینە و بەری ھاتنا وەرزێ زڤستانێ لەزێ د خەرجکرنا پەرەیێ جۆتکاران دە بکە.
داخوازا لێکۆلینا سەربخوە بۆ کوشتنا جوانێ کورد
ل سەر ئاستێ ئەولەھیێ، ئەنەکەسێ کێمکرنا لەزا ڤەگەرانا سازیێن دەولەتێ و زێدەبوونا گۆتارێن توندرەو رەخنە کرن. د داخویانیێ دە رەڤاندن و کوشتنا ھۆڤانەیا جوانێ کورد یێ ب ناڤێ “سیپان” (کو کارمەندێ وەزارەتا بەرەڤانیێ بوو) ب توندی ھات شەرمەزارکرن. ئەنەکەسێ ژ بۆ تەسپیتکرن و دادگەھکرنا بکەرێن ڤێ تاوانێ داخوازا لێکۆلینەکا سەربخوە و زەلال کر.
ھەر وھا د داخویانیێ دە رەخنەیێن توند ل گۆتارێن ب پالدەرێن عەشیرەتگەرایی و نەتەوەیی ھاتن گرتن، ئێریشێن کۆما “جوانێن شۆرەشگەر”یێن بۆ سەر سازیێن دەولەتێ ھاتن شەرمەزارکرن و ھەڤخەمی بۆ قوربانیێن روودانا شەواتا گرتیگەھا کۆبانێ ھات نیشاندان.
د داویا داخویانیێ دە ھات تەکەزکرن کو بەرپرسیاریا تاوانان دکەڤە سەر ملێ بکەران بخوە و نە سەر ملێ تەڤاھیا پێکھاتەیەکێ. ئەنەکەسێ ھەولدانێن چێکرنا فتنەیێ د ناڤبەرا کورد و عەرەبان دە ل ھەرێما جەزیرێ رەد کر و ژ دەولەتێ داخواز کر کو ب کۆنترۆلکرنا چەکێن بێدەستوور و چەسپاندنا سەروەریا قانوونێ، ئاشتیا جڤاکی بپارێزە.
