ھەتا نھا، ژ ئالیێ کوردێن رۆژئاڤا د دەربارێ ڤێ مژارێ دە چ داخویانی نەھاتیە دایین. نە رێڤەبەریا خوەسەر، نە ژی سیاسەتمەدارێن ناڤدار یێن وەکی مەزلووم عەبدی، ئیلھام ئەحمەد و فەوزا یووسف، و نە ژی یەپەگێ، زەلال نەکرنە کا کی گرتیگەھێ ئیدارە دکە.
لێبەلێ، داخویانیا فەرمی یا یەکەم ژ فەرمانداریا ھێزێن ئەولەکاریا ناڤخوەیی یا حەلەبێ ھات. داخویانیێ دەستنیشان کر کو دێ لێپرسینەک ل سەر بوویەرێ هێتە کرن. خالا ھەری ھەستییار یا داخویانیێ ئەو بوو کو کی گرتیگەھێ ئیدارە دکە. د داخویانیێ دە ھات گۆتن، “رێڤەبەریا زیندانا کۆبانی هێژ ب فەرمی ژ بۆ سازیێن حکوومەتا شامێ نەھاتیە ڤەگوھاستن. پێڤاژۆیا ڤەگوھاستنێ د چارچۆڤەیا پرۆسەدورەک دادوەری و یاسایی دە تێ مەشاندن.”
ئەڤ یەک نیشان ددە کو رێڤەبەریا گرتیگەھێ د بن رێڤەبەریا پەیەدێ دەیە. راستیا کو رایەدارێن رۆژئاڤا ھەتا نھا ڤێ یەکێ ئینکار نەکرنە تێ ڤێ واتەیێ کو ئەو ب بێدەنگی داخویانیا ھێزێن ئەولەکاریا ناڤخوەیی یێن حەلەبێ قەبوول دکن.
ژ دەستپێکا بوویەرێ ڤە، مەدیایا پەکەکێ ل رۆژئاڤا و دەڤەرێن دن یێن ھەرێمێ د راپۆرێن خوە دە داخویانیێن گشتی بکار ئانین، ئێش و ئازارێن خزم و کەسێن شەھید بوویی پاشگوھ کرن. د بنگەھ دە، ناسنامەیا ئالیێ بەرپرسیارێ ڤێ بوویەرێ و ھندەک ئالیێن ئەساسی یێن بوویەرێ تێنە ڤەشارتن.
ئەنجاما کو ب ڤی ئاوایی دەرکەت ئەڤە: رێڤەبەریا گرتیگەھێ، کو د دەما شەواتێ دە دەری ڤەنەکرنە، ب رێڤەبەریا رۆژئاڤا ڤە گرێدایییە. خالا گرینگ ئەڤە کو ئاگر ژ بەر کو رێڤەبەریا گرتیگەھێ دخوەست جوانێن کو ل دژی کوشتنا سیپان حزنی نەرازیبوون نیشان ددان ڤەگوھێزنە گرتیگەھەک ل حەلەبێ، دەست پێ کر. رێڤەبەریا گرتیگەھێ دخوەست جوانێن کو د دۆزا سیپان حزنی دە ھاتنە گرتن ڤەگوھێزنە حەلەبێ ژ بەر کو وان باوەر دکرن کو خوەپێشاندان دێ دژی پۆرۆسێسا ئەنتەگراسیۆنێ بن. لۆما ژی گرتیان نەرازیبوون نیشان دان و د حوجرەیێ دە ئاگر پێخستن. رێڤەبەری ھین ژی ب ئیسرار نەخوەست دەرییێ زیندانێ ڤەبکە. گرتیان ھەتا دەری ژی شکاندن. یانی رێڤەبەریا رۆژئاڤا دخوەست جوانێن کو ل دژی کوشتنا سیپان نەرازیبوون نیشان دان رادەستی حکوومەتا شامێ بکە، و ئەڤ یەک بوو سەدەما خوەپێشاندانان.
ب راستی، ئەڤ خالا شکەستنێیە ژ بۆ خەلکێ کۆبانیێ. وەکی دن، ئەحمەد جمۆ، ئاپێ بۆزان دالی، کو ژیانا خوە ژ دەست دا، ژ بۆ مەدیایێ ئاخڤی و گۆت، “ما کەس تونەبوو کو بکاربە دەرییێ زیندانێ ژ بۆ وان ڤەکە؟ گەر ئەو دەری ڤەکریبوونا، ئەڤ تراژەدیا چێنەدبوو.”
رێڤەبەریا رۆژئاڤا نە رەخنەدایینەک و نە ژی داخویانیەک دەربارێ دارزاندنا بەرپرسێن بوویەرێ دە نەدایە. و خەلکێ کۆبانیێ پر ھێرسن ژ بەر کو ئەو دزانن کی بەرپرسیارێ گرتیگەھێیە و دەری ل گرتیان ڤەنەکرییە. شێورمەندێ جۆلانی مەزلووم عەبدی ب لەز و بەز چوویە کۆبانیێ، دا کو بەرتەکا خەلکێ بەرفرەھ نەبە.
وەکی دن، چاڤکانیێن دارکا مازی یێن ل ھەرێمێ رادگھینن کو کادرۆیێن یەپەگێ نێزیکی مالباتێن کەسێن کو مرنە بوونە و ژ وان رە گۆتنە، “ب مەدیایێ رە نەئاخڤن، وەرن ئەم ڤێ یەکێ د ناڤ خوە دە چارەسەر بکن، ئەم دێ وە ژ تەنگاسیا ئابۆری رزگار بکن”
بوویەرێن کۆبانیێ د بنگەھ دە جەوھەرێ پێڤاژۆیا کو ل رۆژئاڤا دقەومەیە. ئەڤ رەوش د داخویانیەکێ دە کو ژ ھێلا پسمامێ مەحموود سابت چەلۆ یێ 21 سالی، کو د شەواتێ دە شەھید بوو، ژ مەدیایێ رە ھاتیە دایین، دەربرینێ ژ راستییا کورت و جەوھەری دکە. چەلۆ د ئاخافتنا خوە دە دبێژە: “تشتێ کو دقەومە د راستیێ دە کۆمکوژیەکە بۆ کۆبانیێ، کۆمکوژیا 6ێ یا ل کۆبانیێ… دەری دەرەنگ ھاتن ڤەکرن. گەر دەری زووتر ھاتبانا ڤەکرن، ئەڤ تشت نەدقەومین. گرتییان ب خوە دەری شکاندن. لێ ژ بەر کو پر دەرەنگ بوو، مرۆڤان ژ بەر ئاگر و دووکەلێ جانێ خوە ژ دەست دان. زیندان د بن چاڤدێریێ دەیە، کامیرە ھەنە. ژیانا مرۆڤان د بن گەفا مرنێ دەیە. مە ھەر جوورە مرن دیتنە، نھا ژی مە مرنا ب شەوتاندنێ دیت. ھەر تشت ل بەر چاڤێن مە دقەومە، یێن دشەوتن ژ کۆبانی نە، پاسەوانێن زیندانێ ژ کۆبانی نە، رێڤەبەر ژ کۆبانی نە.”
کۆبانی دیسا بریندارە، کۆبانی دیسا مەخدوورە.
گەلێ کۆبانی د ناڤبەرا رەژیما شامێ و سیستەما رێڤەبەریێ یا کو ژ ھێلا کادرۆیێن پەکەکێ ڤە تێ رێڤەبرن دە ئاسێ مانە.
رێڤەبەریا کو ل سەر ناڤێ رۆژئاڤا تەڤدگەرە، نە ئیرادەیا خوە رەخنەکرنێ نیشان ددە و نە ژی بەرپرسیاریا ڤێ بوویەرا دلتەزین دگرە سەر خوە.
