عارف گوران، بابێ نارین گورانا 8 سالی کو 2 سال بەرێ ل گوندێ چوولیێ یێ ئامەدێ ب ئاوایەکی ھۆڤانە ھاتبوو کوشتن، ژ بۆ داخوازا “نووڤە-دادگەهکرنێ” و بەردانا ئەندامێن مالباتا خوە، ژ ئامەدێ بەر ب ئەنقەرەیێ ڤە دەست ب “مەشا عەدالەتێ” کر.
عارف گوران بەریا کو بکەڤە سەر رێ، سەردانا گۆرا کەچا خوە نارینێ کر و خاتر ژ وێ خوەست. ل سەر گۆرا نارینێ ب تەڤلیبوونا مالبات و خزمێن وان رە دیمەنێن ھەستیار و خەمگین روو دان. مالباتێ دیار کر کو ژ بەر نەحەقیا ل وان ھاتیە کرن ئەو ڤێ مەشێ ل دار دخن.
د دۆسیەیا کوشتنا نارین گورانێ دە، ھەڤژینا عارف گوران یوکسەل گوران، برایێ وی سالم گوران و کورێ وی ئەنەس گوران سزایێ زیندانا ھەتا-ھەتایێ خواربوون. لێ بەلێ عارف گوران داخویاند کو مالباتا وی بێگونەھە، چ ئەلەقەیا وان ب ڤێ تاوانێ نینە و ئیددیعا کر کو کوژەرێ راستەقینە یێ راستی نەوزاد بەختیارە.
خزم و ئەندامێن مالباتێ ژی بەرتەکێن خوە ئانین زمان. پیرکا نارینێ رەمزیە چاباش و ژنماما وێ دان زانین کو ئەو ل بەندا بەرسڤەکا عەدالەتێ نە و بانگ ل رایەداران کرن کو ڤی بارێ گران ژ سەر ملێ مالباتێ راکن، ژ بەر کو زارۆکێن دن یێن ل مالێ بێ خوەدی مانە.
عارف گوران دا زانین کو ئارمانجا وی ئەوە کو بگھیژە بەر دەریێ کۆشکا سەرۆککۆماریا ترکیەیێ و خوەستەکا خوەیا ژ بۆ دۆزا نووڤە-دادگەهکرنێ بگەھینە ئاستا ھەری بلند. گوران دەستنیشان کر کو ھەتا کو حەقیقەت دەرنەکەڤە ھۆلێ و عەدالەت پێک نەیێ، حەقێ کەچا وی ل ئەردێ دمینە.
