مەسروور بارزانی: ڤەکشینا ئامەریکایێ د دەمەکە ھەستیار دە یە

ئۆفیسا سەرۆکوەزیرێ ھەرێما کوردستانێ دەربارێ نووچەیەکە رۆژنامەیا فايناشیال تایمز یا بریتانی دە داخویانیەک بەلاڤ کر.

ئۆفیسێ دیار کر کو رۆژنامەگەرێ فايناشیال تایمزێ داخویانیێن مەسروور بارزانی وەکی خوە نەدانە و نێرینێن خوە تەڤلی نووچەیێ کرنە.

رۆژنامەیا فايناشیال تایمز  یا بریتانی ئیرۆ راپۆرەک بەلاڤ کر و تێ دە جھ دا ھنەک داخویانیێن سەرۆکوەزیرێ ھەرێما کوردستانێ مەسروور بارزانی.

ئۆفیسا راگھاندنێ یا سەرۆکوەزیر راگھاند، “مخابن نڤیسکارێ راپۆرێ، گۆتنێن سەرۆکوەزیر وەکی خوە بەلاڤ نەکرنە، بەلکی زێدەتر نێرین و شیرۆڤەیێن وی ب خوە نە، نە تامامیا ئاخافتنێن سەرۆکوەزیر.”

داخویانیێن راستین یێن سەرۆکوەزیر

ل گۆری داخویانییا ئۆفیسێ، داخویانیێن ھەری گرینگێن مەسروور بارزانییێن ژ بۆ رۆژنامەیا بریتانی ئەڤن:

– ڤەکشینا ھێزێن ئامەریکایێ و ھەڤپەیمانیێ یا ژ ئیراقێ د دەمەکە ھەستیار دە یە.

– ھەرێما کوردستانێ زێدەتری ھەزار جاری رووبروویی ئێرشێن مووشەکی و درۆنان بوویە.

– ھشتنا ھەرێما کوردستانێ بێیی دابینکرنا ت پەرگالا پاراستنێ، جھێ دلگرانیێ یە.

– بەردەوامبوونا نەئارامیا رەوشا ئەولەھیێ یا ئیراقێ، گەفە ل سەر پەرگالا فەدەرال.

پێوەندیێن ب ئیران و ئامەریکایێ رە

مەسروور بارزانی د داخویانیێن خوە دە بەحسا پێوەندیێن ب ئامەریکا و جیرانان رە ژی کر و گۆت:

“ئەم دۆست و ھەڤپەیمانێن ئامەریکایێ نە لێ د ھەمان دەمێ دە ئەم دخوازن پێوەندیەکە مەیا باش ب ھەموو جیرانێن مە رە ھەبە کو ئیران ژی د ناڤ دە یە.”

مەسروور بارزانی ھەر وھا تەکەز کر کو پێوەندی و گوفتووگۆیێن وان یێن بەردەوام ب بەرپرسێن کۆمارا ئیسلامییا ئیرانێ رە ھەنە.

وی دوجارە کریە کو ھەرێما کوردستانێ ت جاری نە بەشەکە ژ شەر و ناکۆکییان و نە جھێ گەفێ یە ژ بۆ ت ئالیی.

سەرۆکوەزیر مەسروور بارزانی ل سەر ھەبوونا ھێزێن مخالەفەتا ئیرانێ، دیار کرییە کو ئەو ھێز ب سالانە ل ئیراق و ھەرێما کوردستانێ نە و ئەڤ یەک ڤەدگەرە سەردەما رەژیما بەرێ یا سەدام حوسەیین.

پشتگریا ژ بۆ سەرۆکوەزیرێ ئیراقێ

سەرۆکوەزیرێ ھەرێما کوردستانێ دەستنیشان کرییە کو ئەو پشتگریێ ددن سەرۆکوەزیرێ فەدەرال عەلی زەیدی د رووبرووبوونا گەندەلیێ، بێچەککرنا ملیسان و چارەسەرکرنا پرسگرێکێن ھەرێما کوردستانێ و بەغدایێ یێن ل سەر بنگەھا دەستوورێ دە.

ھەر وھا ھاتیە گۆتن کو ئەو ئامادە نە ژ بۆ زێدەکرنا داھاتا گشتی و رووبرووبوونا ئاستەنگی و پرسگرێکێن جوربجور ھەر ھەڤکاریەکێ ب حکوومەتا فەدەرال رە بکن.

مەسروور بارزانی ل سەر رەوشا ناڤخوەیا ھەرێما کوردستانێ ژی دا زانین کو ھەول و گوفتووگۆیێن ئاکتیڤکرنا پارلامەنتۆیا کوردستانێ و پێکئانینا کابینەیا نوویا حکوومەتا ھەرێما کوردستانێ ددۆمن.