سەرۆک بارزانی: پێشمەرگە ئامادەیە بەرسڤا ھەر جورە گەف و مەترسیان بدە

سەرۆک مەسعوود بارزانی ب بۆنەیا بداویھاتنا فەرمی یا ئەرکێ سەربازی یێ ھێزێن ھەڤپەیمانیا ناڤدەولەتی یا ل ئیراق و ھەرێما کوردستانێ پەیامەک بەلاڤ کر. سەرۆک بارزانی خەلکێ کوردستانێ پشتراست کر کو پاراستن و ئارامیا ھەرێمێ د دەستێن ئەولە دەیە و ھشیاریەکا توند دا وان ئالیێن کو خەیالا تێکدانا ئارامیا ھەرێما کوردستانێ دکن.

سەرۆک بارزانی د پەیاما خوە دە دیار کر کو ل گۆری رێکەفتنا د ناڤبەرا ھێزێن ھەڤپەیمانان و حکوومەتا فەدەرالا ئیراقێ دە، ئیرۆ 30ێ ئیلۆنا 2026ێ رۆژا داوییە ژ بۆ بداویھاتنا ئەرکێ سەربازی یێ ھێزێن ھەڤپەیمانان. وی بال کشاند سەر رۆلا گرینگا ھەڤپەیمانیا ناڤدەولەتی د شەرێ ل دژی تەرۆرێ و بھێزکرنا ئارامیێ دە و سپاسیا کەدا وان و گیانێ شەھیدێن پێشمەرگە، ھێزێن ئیراقی و ھەڤپەیمانان کر.

دەربارێ شیرۆڤە و فکارێن پشتی ڤەکشینا ھێزێن ھەڤپەیمانان دە، سەرۆک بارزانی راگھاند کو ھەڤاھەنگیەکا پر باش د ناڤبەرا ھەرێما کوردستانێ و حکوومەتا فەدەرال یا ئیراقێ دە ھەیە ژ بۆ بەرسڤدانا ھەر جورە گەفان، چ د بن ناڤێ داعشێ دە بە یان ب ھەر ناڤەکی دن بە. وی تەکەز کر کو ژ بۆ قۆناغا پاشەرۆژێ ژی، ھەرێم و ئیراق دکارن ل گۆری مەرجان رێکەفتنێن دوئالی لگەل وەلاتێن ھەڤپەیمان بکن.

د داویا پەیاما خوە دە، سەرۆک بارزانی ھشیاریەکا راستەراست دا دژمن و ئالیێن کو مەترسیێ ل سەر ھەرێمێ چێدکن و گۆت: “ھەر کەس و ئالیێ کو خەیال بکە ببە گەف ل سەر ئارامیا ھەرێما کوردستانێ، بلا بزانبە ل ڤر ب قاسی پێویست پێشمەرگە و قەھرەمان ھەنە دا کو بەرەڤانیێ ژ خەلک و ئاخا کوردستانێ بکن و ھەموو دەستدرێژیان تێک بشکینن.”