د چارچۆڤەیا پرۆسەیا یەکخستنا ھێزێن لەشکەری دە ل سووریەیێ، ھەتا نھا 5 ھەزار و 200 شەرڤانێن ھێزێن سووریەیا دەمۆکراتیک (ھەسەدێ) پشتی تەمامکرنا پەروەردەیا لەشکەری تەڤلی رێزێن ئارتێشا سووریەیێ بوونە. پرۆسەیەکە نوو ل چیایێ کەوکەبێ ل گوندەوارێ حەسەکێ دەست پێ کریە و شەرڤانێن ھەسەدێ د بن بانێ ئارتێشا فەرمی دە ئەرکێن خوەیێن نوو وەردگرن.
د پێشڤەچوونا ھەری داوی دە، 1300 شەرڤانێن فەیلەقا دویەم (لیوایا 30) پشتی بداویکرنا راھێنانێن ئاکادەمیک ل ئاکادەمیێن لەشکەری، ل چیایێ کەوکەبێ ل گوندەوارێ حەسەکێ ھاتن بجھکرن. ھێزێن ل پارێزگەھا حەسەکێ ژ سێ لیوایان پێک تێن و ل سەر سێ ناڤەندێن سەرەکی، چیایێ کەوکەب و ھەر دو بارەگەھێن لەشکەری یێن قەسرەک و تل بەیدەرێ کو بەرێ یێن ھەڤپەیمانیا ناڤنەتەوەیی بوون، ھاتنە دابەشکرن.
ل ئالیێ دن، لیوایەکا دن یا ب ناڤێ لیوایا کۆبانیێ کو د ناڤ دە شەرڤانێن ھەسەدێ ھەنە، نھا ل گوندەوارێ شامێ د پەروەردە و راھێنانا لەشکەری دەیە. رایەداران دان زانین کو لگەل بجھبوونا ڤان ھێزان ھەژمارا گشتی یا شەرڤانێن کو تەڤلی ئارتێشا سووریەیێ بوونە گھیشتیە 5200 کەسی و پرۆسەیا تەڤلیکرنا بەش و یەکینەیێن دن ژی بێ ناڤبەر بەردەوام دکە.
شەرڤانێن کو بەشداری ڤێ پرۆسەیێ بوونە دیار دکن کو پشتی سالێن درێژ یێن شەرێ ل دژی داعشێ، نھا بەرپرسیاریا وان یا لەشکەری بەرفرەھتر بوویە. وەکی کو ئەو دەستنیشان دکن، بەرێ ئەرکا وان تەنێ پاراستنا ھەرێمێن باکور و رۆژھلاتێ سووریەیێ بوو، لێ د ڤێ قۆناغا نوو دە وەکی بەشەکێ فەرمی یێ ئارتێشا سووریەیێ، دێ ئەرکێ پاراستنا تەڤاھیا ئاخ و سینۆرێن وەلات ل ھەمبەر ھەر جورە گەف و ئێریشان بگرن سەر ملێن خوە.
