سەرۆکێ حكوومه‌تا ھەرێما کوردستانێ مەسروور بارزانی ئیرۆ 6ێ جۆتمەھا 2026ان، 7ەمین پێشانگەھا تەکنۆلۆژیێ یا هايتێكسێ ل باژارێ ھەولێرێ ڤەکر. ل پەراویزا پێشانگەھێ و د داخویانیەکێ دە ژ بۆ رۆژنامەڤانان، سەرۆکوەزیر بال کشاند سەر چەند پرسێن گرینگێن سیاسی، ئەولەھی و ئابۆری و ھەلوەستا حكوومه‌تێ یا ل سەر روودانان رۆنی کر.
چالاککرنا پارلامەنتۆیێ و پێکئانینا حكوومه‌تا نوو
سەرۆکوەزیرێ ھەرێما کوردستانێ رەخنەیێن توند ل بۆیکۆتکرنا روونشتنێن پارلامەنتۆیێ گرتن و گۆت: “من دوھ ژی د ئاھەنگا دەرچوونا خوەندەکارێن زانینگەھا دھۆکێ دە داخواز کر کو ھەموو پارلامەنتەر ڤەگەرن، دا کو پارلامەنتۆیێ چالاک بکن؛ چونکی ب راستی ئەڤ بەرپرسیاریەکە نشتمانییا وان کەسانە کو خەلکێ دەنگ دایە وان. ھەقە ئەو ژی ھەست ب ڤێ بەرپرسیاریێ بکن و ل ھەمبەری وان دەنگێن کو وەرگرتنە وەفادار بن. نھا خوە دانە ئالیەکی و نایێن کو پارلامەنتۆیێ چالاک بکن؛ ئەڤ یەک ب راستی رەڤینا ژ بەرپرسیاریێیە”.
ھەروھا گۆت: “ھێڤیدارم ھەموو پارلامەنتەر وەرن؛ ئەگەر گۆتنەکە وان ھەبە ژی، بلا وەرن د پارلامەنتۆیێ دە گۆتنا خوە ببێژن. ئەز نزانم ژ چ دترسن؟ کەسەک ھەست بکە کو پارلامەنتۆ ملکێ ملەتە، دکارە چ بابەت ھەبە، چ رەخنە ھەبە و چ نیقاش ھەبە ل ور بینە زمان. پێویستە ئەڤ سازی د زووترین دەم دە وەرە چالاککرن. داخوازێ ژ پارلامەنتەرێن دن دکم کو ئێدی دەمێ فێرۆ نەدن؛ ژ بەر کو ھەوجەدارییا مە ب پارلامەنتۆیێ ھەیە. ھەتا ژ بۆ ئاڤاکرنا حكوومه‌تێ ژی دڤێ پارلامەنتۆ وەرە چالاککرن و بلا ئەم وێ پێنگاڤا پێویست ژ بۆ پێکانینا حكوومه‌تێ ژی باڤێژن”.
ڤەکشینا ھەڤپەیمانان و ئامادەبوونا پێشمەرگە
دەربارێ پرسا بداویبوونا ئەرکا ھێزێن ھەڤپەیمانانا ل ئیراقێ دە، مەسروور بارزانی بەحسا وێ یەکێ کر: “ژ خوە دیار بوو کو رۆژەکێ دێ ھێزێن ھەڤپەیمانیێ دەرکەڤن؛ ژ بەر کو ئەرکێ شەرێ ل دژی داعشێ ب داوی بوویە و ئەو ھێز، ھێزەکە ھەڤپەیمانا بۆ ڤی شەری بوو. لەوما ژ بەر کو ئەڤ ئەرک خەلاس بوویە، نھا ب تەمامی دچن. لێ ئەڤ نایێ وێ واتەیێ کو پێوەندیێن وان ھێزان ئان وان دەولەتان یێن ل گەل ئیراقێ و ھەرێما کوردستانێ بەر ب داویێ ڤە دچن.
ھەروھا گۆت ژی: “د دەما خوە دە ژی، د شەرێ داعشێ دە پرانییا شەران ھەر پێشمەرگە و ھێزێن ئیراقێ کرن. نھا ژی وسایە؛ ھەم ھێزێن ئیراقێ د ئاستەکە باشتر دە نە، ھەم ژی ھێزا پێشمەرگە ئامادە، خورت و د ئاستەکە پر باش دەیە کو کاربە رووبروویی ھەر مەترسیەکێ ببەیا کو روو بدە ئیراقێ و ب تایبەتی ھەرێما کوردستانێ. ژ بەر ڤێ یەکێ، چ مەترسیا مە نینە کو ڤالاھیەکە ئەولەھیێ دەرکەڤە ھۆلێ”.
دابینکرنا سیستەما بەرەڤانییا ئاسمانی
سەرۆکوەزیرێ ھەرێما کوردستانێ ئاماژە ب وێ یەکێ کر: “تەنێ خالەک کو ل جەم مە گرینگە، بابەتا دابینکرن و بدەستخستنا سیستەما ئانتی-درۆنانە؛ ئانگۆ ھێزا بەرەڤانیا دژ-ئاسمانی. د ڤی واری دە ئەز وسا باوەر دکم کو ھەوجەدارییا مەیا زێدەتر ب ھەڤکارییا دۆستێن مە ھەیە. ئەم لگەل حكوومه‌تا فەدەرال بەردەوام د گۆتووبێژان دە نە و ب دۆستێن خوە رە ژی د دانووستاندنا بەردەوام دە نە، ژ بۆ دابینکرنا بەرەڤانیا دژه-ئاسمانی. ب باوەرییا من، ژ وی ئالی ڤە ژی پاشێ چ مەترسیەک نامینە”.
سەرۆکوەزیر مەسروور بارزانی دلنیایی دا گەلێ ھەرێما کوردستانێ و تەکەز کر: “ئەز دخوازم ژ ڤر ژی ڤێ گۆتنێ جارەک و چەند جاران دوبارە بکم؛ بلا خەلکێ کوردستانێ پشتراست بن، ب راستی ت پرسگرێک و مەترسیەکە ئەولەھیێ ل سەر ھەرێما کوردستانێ نینه”.
پێوەندیێن ھەولێر و بەغدایێ و پرسا دارایی
دەربارێ پێوەندیێن ناڤبەرا ھەولێر و بەغدایێ دە، سەرۆکوەزیر گەشبینیا خوە نیشان دا و گۆت: “ژ بەر وان پێوەندیێن باشێن کو نھا ل گەل حكوومه‌تا فەدەرال ھەنە، کێشەیێن کەڤن بەر ب چارەسەریێ ڤە دچن. دەربارێ پرسا مووچە و بودجەیێ دە ژی تەکەز کر کو ئەو د ناڤ گۆتووبێژێن بەردەوام دە نە ژ بۆ دابینکرنا تەڤاھیا شایستەیێن دارایی یێن ھەرێما کوردستانێ ل گۆری دەستوورێ”.
