تێکۆشەرێ ژ گەڤەرێ عیسا بەشیر کۆچا داوی کر

یەک ژ کەسایەتێن دیار یێن دەڤەرا گەڤەرێ و ژ کەدکارێن دیرۆکا سیاسییا کوردستانێ عیسا بەشیر، شەڤا بۆری د تەمەنێ 90 سالیێ دە ل باژارێ وانێ کۆچا داوی کر.

عیسا بەشیر د قۆناغێن ھەری ھەستیار و چارەنووسسازێن تەڤگەرا رزگاریخوازا کوردستانێ دە ب ھەلوەست، کەد و خەباتێن خوە یێن نەتەوەیی دھاتە ناسین. ب تایبەتی د سەردەمێن دژوارێن تێکۆشینێ دە، وی ب رێ و ھەولدانێن خوە د دەرباسکرن و گھاندنا ب ھەزاران پەنابەران بەر ب ئاخا ئیرانێ دە رۆلەکە مرۆڤی و گرینگ لیست.

پشتی وان رۆژان، وی خەباتێن خوەیێن سیاسی بێناڤبەر دۆماندن. ب تایبەتی پشتی ناسینا ب سەرکردەیێ نەمر ئیدریس بارزانی رە، گەلەک کار و ئەرکێن گرینگ گرتن سەر ملێ خوە و سالێن دوور و درێژ د ڤێ رێیێ دە کەد دا. د سالێن پاشین دە ژی وی ل گەل سەرۆک مەسعوود بارزانی کار کر و د گەلەک قادێن خزمەتێ دە جھێ خوە گرت.

عیسا بەشیر، کو ھەم ژ ئالیێ شەھید ئیدریس بارزانی و ھەم ژی ژ ئالیێ سەرۆک مەسعوود بارزانی ڤە دھاتە پێشوازیکرن، ھەتا داویا تەمەنێ خوە وەکی کەسەکی دلسۆز ل سەر رێبازا بارزانیێ نەمر ما.

ژیانا عیسا بەشیر رێویتیەکە تژی فەداکاری، تێکۆشین، باوەری و دلسۆزیێ بوو. کورێ ھێژایێ گەڤەرێ پشتی 90 سالان ژیانا تژی کەد کو شاھدێ سەردەمەکە دیرۆکی بوو، ل پەی خوە میراتەیەکە ب روومەتا وەلاتپارێزیێ ھشت و خاتر ژ ڤێ دنیایێ خوەست.