رێڤەبەریا کەشناسیێ یا ترکیەیێ ژ بەر پێلەکا بھێزا بارانبارین، رەشەبا و رابوونا لەھیێ ژ بۆ 31 پارێزگەھان، کو باژارێن باکورێ کوردستانێ و مەترۆپۆلێن مینا ستەنبۆل، بوورسا و زۆنگولداکێ ل خوە دگرە، ھشیاریا ئاستەنگی و مەترسیێ دا.
ل گۆری داخویانیا وەزیرێ ژینگەھ، باژارسازی و گوھەرتنا کەشوھەوایێ موراد کۆروم، ھەموو سازیێن تێکلدار ژ بۆ رووبرووبوونا ڤێ پێلا ھەوایێ کەتنە رەوشا ئامادەباشیێ. کۆروم بانگ ل وەلاتیان کر کو ھشیاریێن فەرمی ب بالداری بشۆپینن دا کو زرارێن جانی و مالی چێنەبن. ل ھەرێمێن چیایی و باشوورێ رۆژھلاتێ باکورێ کوردستانێ تێ پایین کو لەزا بایی بگھیژە 40 ھەتا 80 کم د دەمژمێرەکێ دە، کو ئەڤ یەک مەترسیا داچوونا ئەردێ و ئاستەنگیێن ترافیکێ زێدەتر دکە.
ئەڤ پێلا خورت ل گەلەک دەڤەران ژیان سەقەت کریە. ل ناڤچەیا پەندکێ یا ستەنبۆلێ، ژ بەر بلندبوونا ئاستا ئاڤێ د چەمێ گۆجبەیلیێ دە، لەھیێ ئۆتۆمۆبیلەک لگەل 3 سوارێن وێ بر. کەسەکی ژ وان ب شکاندنا شووشەیێ و گرتنا تایێ دارێ خوە رزگار کر، لێ لێگەرینا تیمان ژ بۆ دیتنا دو کەسێن دن بەردەوام دکە.
زانیاری دیار دکن کو ئەڤ کارەساتا خوەزایی تەنێ چەند رۆژان پشتی لەھیا بەرێ یا ستەنبۆلێ روو ددە کو د ئەنجاما وێ دە 4 کەسان ژیانا خوە ژ دەست دابوو. مەترسییا لەھیێن ژ نشکێ ڤە د ڤان سالێن داوی دە ژ بەر گوھەرتنا کەشوھەوایێ و کێمکەتنا قادێن کەسکاتیێ ل باژارێن مەزن زێدە بوویە. سازیا کەشناسیێ ب سیستەما ھشیاریا رەنگان (زەر و پۆرتەقالی) خەباتێن خوەیێن ھشیارکرنا رایا گشتی ددۆمینە.
