ئەرک و بەرپرسیارێتی نووسەرانی کورد و کۆنگرەی ئێمە!!!
کۆنگرەی فیدراسیۆنی نووسەرانی کوردستان لە دیاسپۆرا، لە ڕێکەوتی 25/7/2026دا لە وڵاتی ئەڵمانیا بەڕێوەدەچێت.
بووبێ ئەسەر
ئەگەر بە فراوانی و بە چاوێکی دووربینەوە سەیری مێژووی گەلانی جیهان بکەین، پێکەوە دەبینین نووسەرانی هەر وڵاتێک چۆن لە ڕێگای نووسینەوە کار و خەباتیان کردووە و گەلەکەیان لە شەوەزەنگ دەرهێناوە و گەیاندوویانەتە ڕووناکی. لەسەر ئەوە نووسیویانە کە گەلەکەیان چۆن دەبێ لە دژی داگیرکەر، واتە دوژمنەکەیان خەبات بکەن.
نووسەرانی وڵاتە چەوساوەکان هەمیشە بە نووسین و بۆچوونەکانیان ڕێنوێنی سەرکردە و پارتە سیاسییەکانیان بوون. هەمیشە بە نووسینەکانیان ئاماژەیان بە هەڵەی بەرپرسان و ڕێبەرانی وڵاتەکەیان کردووە بۆ ئەوەی جارێکی دیکە هەڵە نەکەنەوە.
ئەگەر نووسەرانی وڵاتانی ستەملێکراو ڕۆڵ و ئەرکی خۆیان بە باشی بگێڕن، دەتوانن نوێنەری ئازادیی گەلەکەیان بن. چونکە هەموو میللەتێک لە ڕێگەی خوێندنەوە و نووسینەوە پێشدەکەوێت. میللەت، واتە خەڵکی نەخوێندەوار، هەمیشە لە دواوەیە. هەر بۆیە ناتوانن بە پێی هێڵی نەتەوەیی لە وڵاتەکەیاندا بجووڵێنەوە. چونکە تەنانەت کەسانی غەیرە نەتەوەیی هەمیشە تاکەکەسی دەجووڵینەوە یان بیردەکەنەوە.
ئەگەر هزری نەتەوەیی لە وڵاتێکدا بەهێز نەبێت، ئازادی و سەربەخۆیی ئەو وڵاتەش زۆر سەخت و دژوار دەبێت. بۆیە سەرکردەی وڵاتان، بەتایبەتی سەرکردەکانی کوردستان، ئەوەی پێویست بێت بۆ پێشکەوتنی نووسەرەکانیان، دەبێ بیکەن.
کاتێک سەیری بارودۆخی هەر چوار پارچەی کوردستان دەکەین، دەبینین نووسەرانی هەر پارچەیەک هاوشیوەی بزووتنەوە و حزبە سیاسییەکانیان دابەشبوون. ئەوان لەسەر یەکتر نین، وەک پێویست بەهای و ڕێزی یەکتر ناگرن. بۆیە ناتوانن کاریگەری لەسەر سیاسەتمەدارەکانیان دروست بکەن. تەنها کاتێک نووسەران خاوەنی دامەزراوە یان ڕێکخراوێکی بەهێز و نیشتمانی بن دەتوانن کاریگەری ئەرێنییان لەسەر ڕێبەرانی وڵاتەکەیان هەبێت.
لە وڵاتێکی وەک کوردستان ئەگەر ئەو نووسەرانەی هەن، یەکگرتوو نەبن و لە ژێر یەک چەتر و دامەزراوەیەکدا یەکنەگرن، کار و هەوڵەکانیان زیاتر بۆ تاکەکان ئەنجام دەدرێت. بەڵام ئەمڕۆ گەلەکەمان پێویستی بە یەکبوون و ڕێکخراوبوونی نووسەرانی کورد هەیە.
کاتێک؛ یەکەم هەنگاوی فیدراسیۆنی نووسەرانی کورد لە دیاسپۆرا هەڵگیرا و کرایەوە. ئامانج و مەبەستی ئەوە بوو کە بتوانێت نووسەران و ڕۆشنبیران و مێژوونووسانی لە ژێر چەتری ئەم ناوەندەدا یەکبخات. یەکگرتوویی ئەوان کوردستانی ئازاد بەرەو سەربەخۆیی و پارچەکانی دیکەی کوردستانیش بەرەو ئازادی دەبات.
دوای دامەزراندنی، واتە دامەزراندنی فیدراسیۆنی نووسەرانی کورد لە دیاسپۆرا، کە سەر بە ڕەوەندی کوردستانە، هەنگاوی باش و ئەرێنی نرا و دەنرێن بۆ گەیشتن بۆ ئەوەی کە یەکگرتوویەکی خوازراو پێکبێت. ئەمڕۆ گەلەکەمان لە هەموو کاتێک زیاتر پێویستی بە یەکیەتیی هەموو بەشەکانی کۆمەڵگە هەیە. هەر بۆیە ئێمە وەک بەڕێوەبەرانی ئەم فیدراسیۆنە دوو ساڵە کار دەکەین بۆ ئەوەی هەموو نووسەرانی کورد لە دیاسپۆرا لە ژێر یەک چەتردا یەکبخەین.
بۆیە دەڵێم هەنگاو و هەوڵی بەرفراوانمان ناوە بۆ ئەوەی کە هەموو نووسەران و ڕۆشنبیرانی کورد لە دیاسپۆرا ڕێکبخەین. بۆ ئەوەی کە ڕێکخراوەکەیان بە ناوی فیدراسیۆنی نووسەرانی کوردستان لە دیاسپۆرا بەهێز ببێت، کار دەکەن و هەوڵ دەدەن.
بەهێزبوونی فیدراسیۆنی نووسەرانی کوردستان لە دیاسپۆرا، بەو مانایەیە کە نووسەرانی ژێر چەتری ئەم فیدراسیۆنە ڕۆڵ و بەرپرسیارێتی خۆیان بگێڕن. ئەوان پەلە بکەن بۆ ئەوەی دۆزی گەلەکەیان لە دیاسپۆرا، لە نووسەر و ڕۆشنبیرانی جیهان تێبگەیەنن کە دەبێ کوردیش دەوڵەتی خۆی هەبێت.
چونکە هەتا کورد دەوڵەتی سەربەخۆی خۆی نەبێت، ئەوان دەرفەتی کارکردنیان وەک نووسەری جیهانی نابێت. هەر بۆیە پێویستە تا دەتوانین فیدراسیۆنی نووسەرانی کوردستان لە دیاسپۆرا بەهێزتر بکەین. ئەویش بەو بەهێزبوونە بە ئەرکی خۆی هەڵدەستێت. ئەمەش هەنگاوێک دەبێت بەرەو سەربەخۆیی باشووری کوردستان. چونکە کوردستان لە نێوان چوار دەوڵەتی داگیرکەردا گەمارۆ دراوە و تەنها باشووری کوردستان ئازادیی خۆی بەدەست هێناوە و هەنگاو بۆ سەربەخۆیی دەنێت.
هەر لەبەر ئەم هۆکارەش پێویستە هەموو نووسەرانی کورد لە دیاسپۆرا لەپێناو سەربەخۆیی باشووری کوردستاندا بدوێن و بنووسن. پێویستە هەوڵ بدەین بە نووسینەکانمان نووسەران و سیاسەتمەدارانی ئەوروپی بکەینە دۆستی خۆمان بۆئەوەی ئەوانیش بتوانن داخوازییەکانی گەلی کورد بە ڕێبەران و پەرلەمانەکانیان بگەیەنن.
با هەوڵبدەین پرسی کورد لە پەرلەمانەکانی ئەوروپادا نیقاشی لەسەر بکرێت. ئێمە وەک نووسەرانی گەلەکەمان دەبێ ئەم کارە بکەین. کاتێک ئەم کارەمان کرد، ئەوکات سەربەخۆیی باشووری کوردستان و ئازادی پارچەکانی دیکەش نزیکتر دەبێتەوە.
بۆ کوردستانێکی سەربەخۆ و ئازاد و دیموکراتیک، پێویستە ئێمە هەموو نووسەرانی کورد بۆ ئەم دروشمە یەکبگرین. پێویستە بە گشتی لە ژێر چەتری فیدراسیۆنی نووسەرانی کوردستان لە دیاسپۆرا لە ژێر خێمەی ڕەوەنددا یەکبگرین.
جگە لە یەکڕیزی نووسەران و سیاسەتمەداران و ڕووناکبیر و ڕۆشنبیرانی گەلی کورد هیچ ڕێگایەکی ترمان نییە. بۆیە داوا لە هەموو لایەکتان دەکەم کە وەرن با وێکڕا فیدراسیۆنی نووسەرانی کوردستان لە دیاسپۆرا خورت و بەهێز بکەین.
بەم بۆنەیەوە ڕایدەگەیەنم کە کۆنگرەی فیدراسیۆنی نووسەرانی کوردستان لە دیاسپۆرا، لە ڕێکەوتی 25/7/2026دا لە وڵاتی ئەڵمانیا بەڕێوەدەچێت. بەم بۆنەیەوە پیرۆزبایی لە کۆنگرەکەمان دەکەم. هیوادارم کە دوای کۆنگرەکەمان و هەڵبژاردنی کۆمیتەیەکی نوێ و چالاک، باشتر کار بکەین.
ئێمە پێکەوە بەهێزترین!!!
