مەسروور بارزانی سەرەخۆشی لە کەسوکاری قوربانییانی لافاوەکەی هەولێر دەکات

بەگوێرەی ئامارە فەرمییەکان، بەهۆی لافاوەکەی هەولێر دوو کەس گیانیان لەدەستداوە.

مەسرور بارزانی سەرۆکوەزیرانی هەرێمی کوردستان لە رێگەی پەیوەندی تەلەفۆنییەوە، پرسە و سەرەخۆشی لە بنەماڵە و کەسوکاری هەردوو قوربانییانی لافاوەکەی شەوی رابردووی هەولێر کرد.

فەرمانگەی میدیا و زانیاری حکوومەتی هەرێمی کوردستان بڵاویکردەوە، پاشنیوەڕۆی ئەمڕۆ یەکشەممە 8ـی تشرینی دووەمی 2026، مەسرور بارزانی، سەرۆکی حکوومەتی هەرێمی کوردستان، لە رێگەی پەیوەندیی تەلەفۆنییەوە، پرسە و سەرەخۆشی لە بنەماڵە و کەسوکاری قوربانییانی لافاوەکەی شەوی ڕابردووی شاری هەولێر، خوالێخۆشبووان محەممەد ڕەسوول و مستەفا سەرکەوت کرد و هاوخەمیی قووڵی خۆی پێگەیاندن.

فەرمانگەی میدیا و زانیاری ئاماژەی بەوەشکردووە، ئومێد خۆشناو پارێزگاری هەولێر، بە نوێنەرایەتیی سەرۆکوەزیرانی هەرێمی کوردستان، بەشداریی لە هەردوو پرسەکەدا کرد و سەرەخۆشی لە بنەماڵەی کۆچکردووان کرد.

شەوی ڕابردوو لافاو زیانی بە ژمارەیەک گەڕەک و ماڵ و موڵکی شاری هەولێر گەیاندووە. چەندین تیمی فریاگوزاری و خۆبەخش بۆ یارمەتیدانی قوربانییەکان ئەرکدار کراون.

لە ڕۆژی پێنجشەممە 5/11/2026ـەوە شەپۆلێکی بارانبارینی بەخوڕ ناوچەکانی هەرێمی کوردستانی گرتۆتەوە و شەوی شەممە 7ی مانگ، گەیشتە لووتکەی خۆی، بارانبارینی بەخوڕ لە ماوەیەکی کورتدا بووە هۆی دروستبوونی لافاو لە ژمارەیەک گەڕەک و شەقامەکانی هەولێر، ئەمەش پەککەوتنی بەرچاوی بۆ هاتووچۆ و گواستنەوەی هاووڵاتیان دروستکرد.

بەگوێرەی ئامارە فەرمییەکان، بەهۆی لافاوەکەی هەولێر دوو کەس گیانیان لەدەستداوە، یەکێکیان مستەفا تەمەنی 5 ساڵانە و ئەوی دیکەشیان خۆبەخشێکی تەمەن 25 ساڵان بوو و لەکاتی ڕزگارکردنی خەڵکدا گیانی لەدەستدا.

بۆ پاراستنی گیانی هاووڵاتیان و ڕەخساندنی دەرفەت بۆ تیمەکانی شارەوانی بۆ پاککردنەوەی شەقامەکان، پارێزگای هەولێر بڕیاریدا ڕۆژی یەکشەممە 8/11/2026، لەسەرجەم ناوەندەکانی پەروەردە، باخچەی ساوایان و قوتابخانە و زانکۆکان، پشووی فەرمی بێت. هەروەها حکوومەتی هەرێمی کوردستان هەموو تیمەکانی فریاکەوتن و قەیرانەکانی خستووەتە ئامادەباشی بۆ هاوکاریکردنی لێقەوماوان و کەمکردنەوەی زیانەکان.