ئەنەکەسە و پەیەدە داخوازا یەکرێزیا سیاسی دکن

بەرپرسا تێکلیێن گشتییێن پەیەدێ رادگھینە، ھەلوەستا برێز مەسوود بارزانی سەرۆکێ پارتیا دەمۆکرات ئا کوردستانێ یا ژ بۆ یەکرێزیا کوردی جھێ رێزێیە و هەر تشتشێ بکەڤە ملێ پەیەدێ، ئەو ژێ رە ئامادە نە.

بەرپرسا تێکلیێن گشتییێن پەیەدێ جوولیا کوردۆ دەربارێ یەکرێزیا کوردی و دەستپێشخەریا فەرماندارێ گشتییێ هەسەدێ مەزلووم ئەبدێ دە راگھاند، داخوازێن ئەنەکەسێ یێن ڤەکرنا نڤیسگەھێن خوە و دیارکرنا چارەنڤیسا گرتی و ونداکریان، نە گرێدایی پەیەدێ یە، ژ بەرکو پەیەدە وەک پارتیەکە سیاسی دخەبتە، و پرسا چارەنڤیسا گرتی و ونداکریان پرسەکە گرێدایی وان نیە بەلکو ئەو پرس گرێدایی ھێزێن ئاسایشێیە.

جوولیا کوردۆ ھەروھا دیار کر: فەرماندارێ گشتییێ هەسەدێ مەزلووم ئەبدی ئاماژە ب وێ یەکێ کر، د پرسا گرتی و ونداکریان دە، پێویستە کۆمیتەک بێ ئاڤاکرن. ڤەکرنا نڤیسگەھێن ئەنەکەسێ ژی گرێدایی رێڤەبەریا خوەسەرە.

کوردۆ راگھاند ژی، رێڤەبەریا خوەسەر، پرۆژەیا ھەری پێشکەتییە د ھوندرێ سووریێ دە، ھەگەر پرۆژەیەکە دن ل جەم ئەنەکەسێ ھەبە، یان تێبینی و پێشنیازێن وان ل سەر رێڤەبەریا خوەسەر ھەبن، تو ئاستەنگی ژ ئالیێ مە ڤە نینن کو وان پێشکێش بکن. ژ بەر کو رێڤەبەریا خوەسەر نە تەنێ ب رەنگێ پەیەدێیە و پارتیێن دن ژی جھێ خوە تێ دە گرتنە.

دا زانین ژی، دڤێ دەستپێکێ یەکرێزی د ھەلوەستا سیاسی دە بێ ئاڤاکرن، پشترە ل سەر ماسەیا دانووستاندنێ، ھەموو مژارێن دن بێنە گوفتووگۆکرن. تابی د قۆناخا بووری دە گەلەک شاشتی چێ بوون و تابی دێ جھێ رەخنەیێ ژی بن.

بەرپرسا تێکلیێن گشتییێن پەیەدێ ئاماژە ب ھەلوەستا مەسعوود بارزانی دەربارێ یەکرێزیا کوردی دە کر و گۆت: ھەلوەستا برێز مەسوود بارزانی جھێ رێزێیە و ئەم پشتەڤانیا وی دکن، ھەگەر چ ل ملێ مە وەک پەیەدێ بکەڤە، ئەم ژێ رە ئامادە نە.