كهمپینا كهجهكێ یا نوو «تەجرید، فاشیزم و داگیرکەریێ دهرباز بكه؛ دەما مسۆگەرکرنا ئازادیێ یە»
ل رۆژا 10ی ئیلۆنێ، ل سەر ناڤێ کۆنسەیا رێڤەبەر یا كهجهكێ داخویانییەک ھاتە دان و وهھا ھاتە گۆتن: «بلا تەجرید، فاشیزم و داگسرکەری بقەدە، دەم دەمێ مسۆگەر کرنا ئازادیێ یە» وهك كهمپین ھاتە راگهھاندن، د داخویانیێ دا 100 سالێن دوماهیێ د ھاتنە نرخاندن، ئارمانجا تەڤگەرێ ب ڤان گۆتنێن ژێرین دا دیار دبیت: ئارمانجا ڤێ كهمپینێ ب ڤان گۆتنان دهێته دیار کرن «ئارمانجا ڤێ گاڤێ ئەوە کو ئەم سیستەمێ ئهشکەنجێ یا ل سەر ئیمرالیێ دهێته مەشاندن ھهلوەشینین، ئەو شەرێ خاس و دەرۆنی یێ ل دژی گەل دهێته برێڤەبرن بدهین راوهستاندن، لههڤهاتنا ئاكهپێ-مهههپێ و ئەرگەنەکۆنێ یا کو داگیرکەریێ بەلاڤ دکەت، ل دەرڤە و ناڤخۆ و ئەو زەختا کو ل سەر گەلێ کورد و گەلێن دی ههیی، ھهلوەشینین«.
گۆتنێن ل ژێر یەکدەستییا پهكهكێ دا: ئازادی، بەرخوەدان، دەمۆکراسی و پاشەرۆژ
گەر ئەڤ گاڤه سەر بکەڤیت دێ چ قهومیت، ھەکە ئەم ب کورتی لێ بنێرین، «ھێزا دەمۆکراتیک یا شۆرەشگەرییا کوردان، ھێزێن دەمۆکراتیک یێن ترکیێ و گەلێن رۆژھهلاتا ناڤین، دەما کو ئەو خهباتا خۆ بکەنه ئێك و ب وێ ھێزا خۆ بچن ژێر ڤێ لههڤهاتنا ئاكهپێ-مهههپێ، دێ مسۆگەر سەرکەڤین، ئەڤ دەستکەفته نە تەنێ بۆ کوردستانێ و ترکیێ یە، ژ بۆ رۆژھلاتا ناڤین ژی دێ دەمۆکراسی، ئازادی و ھەموو نرخێن دی بلند كهت و ژ بۆ جیھانێ ژی بیته نموونه».
ئەڤ ھەڤۆکە نە بۆ کەسێن کو جارا ئێكێ داخویانیێن كهجهكێ دبهێزین و دخوینن، دبیت کو رۆمانتیک و كاریگهر بهێنه دیتن، لێ کەسێ کو خەتا پهكهكێ-كهجهكێ کێم و زێدە د شۆپینه و خودان ھشمەندییەکا دیرۆکی بیت، دێ شێت ڤێ راستیێ بینیت، «پێنگاڤا کو كهجهكێ ل 12ێ ئیلۆنێ دایه دەستپێکرن، دوبارەکرنا پێنگاڤێن ڤان 20 سالێن دوماهیێ نە»، كهجهكه ھەر جار پەیڤێن رێبەر ئاپۆ، تەجرید، پاشەرۆژ، ب رەنگەکی دی دیزاین دکەت و ھەر جار ژی وەک تشتەکێ گهلهك نوو خولقاندی ددەته دیار کرن، ھەکە ئەم پێنگاڤێن كهجهكێ یێن ڤان 20 سالێن دوماهیێ بینین بیرا خۆ.
كهمپینێن پهكهكێ
-
2001- 2003 كهمپینا ب خودان دهركهتن و پاراستنا رێبەری.
-
2005-2004 كهمپینا ئازادی ژ بۆ رێبەراتیێ.
-
2006-2005 كهمپینا ئۆجالان ئیرادهیا من یا سیاسی یە.
-
2007 كهمپینا ئێدی بەسە.
-
2009 كهمپینا بهرێز ئۆجالان.
-
2012 كهمپینا یان ئازادی، یان ئازادی.
-
2014 كهمپینا مسۆگەرکرنا ئازادییا فیزیکی یا سەرۆکاتیێ.
-
2015 كهمپینا رێڤەبەرییا خوەسەر.
-
2019 كهمپینا ئەم تەجریدێ بشکێنین، فاشیزمێ ھهلوەشینین و کوردستانێ ئازاد بکهین
-
2020 كهمپینا دەم دەمێ ب دوماهی ئینانا تەجرید، فاشیزم و داگیرکەریێ یە؛ دەمێ دابینکرنا ئازادیێ یە.
ئهڤه كهمپینێن ھەری مەزنن کو ئەم بەحس دکهین، ھندهک ژی د ئاستا ھەرێمی دا ب كهمپینێن بهرتەنگ دهێنه مەشاندن وەک یێن ژن و گهنجان.
ئارمانج د ھەمان پەیڤان دا دهێته گۆتن، گەر ھوون داخویانیێن ڤان پێنگاڤان کۆمبکهن و بینن گەل ھەڤ، ھوون دێ ببینن کو د سالا 2001 ھەتا 2020ێ دا ھەمان ھەڤۆک و پەیڤ ھاتینە ب کار ئینان، د دەستپێکێ دا بەحسا دیرۆکێ دکەن و دبێژن: «ئازادییا ئۆجەلان ئازادییا مەیە، ھهلوەشاندنا پەرگالا تەجریدێ یا ئیمرالییێ دێ رێ ل بەر رۆناکبوونا رۆژھهلاتا ناڤین ڤەکەت و دێ ترکیێ دەمۆکراتیزە کەت» ژ بۆ ھەر پارچەیەکێ ژی كار دهێنه دیار کرن».
ئەڤه 20 سالن ئەڤ پێنگاڤه خوە دوبارە دکهن و ملیمەکێ ژی پێشکەفتن چێنە کرییە، پهكهكه داخویانیەکێ ددەت، و رێخستنێن پێکھاتەیێن وێ پشتگریێ ددهنه ڤێ پێنگاڤێ، ئەو جهماوهرێ ل دۆرا پهكهكێ كێمه لێ گهلهك ئالا و گەلەک وێنەیێن ئۆجالان نیشان ددهن، ئانكو ب وێنە و ئالایان د خوازن وه نیشان بدهن كو جهماوهرهكێ مهزن ههیه، پشتی مەھەک-دو مەھان، كهجهكه دیسان ھەر کەسهكی گازی كاری دکەت و ب ڤی رەنگی ھەر بھار و پاییزێ ب موزیکێ، ستران و دیلانان وهسا هزر دكهن کو ئەو بۆ شۆرەشا کوردستانێ خزمەتێ دکهن و وەزیفەیەکا پیرۆز پێک تینن، لێ بەلێ، کەسێ کو ل پاریس یان فرانکفۆرتێ دكهته هاوار و ببێژیت: «بژی براتییا گەلان، بژی سەرۆک ئاپۆ» ل سەر تێکۆشینا ئازادیێ یا کوردستانێ چ كاریگهرییا خۆ ناکەت، ھەتا ئەم دشێین ببێژین د ناڤا ڤێ، چەرخا خرش دا ب ئاوایەکێ دزینا مۆرالا کوردان دهێته ئارمانچ کرن.
ناپلیۆن: ھونەرا پەیڤێ تنێ دوبارەکرنە
پهكهك گهلهك ب ژیری بهردهوامیێ ب «زڤرۆکا خرش» ددهت، پهكهكە ب ئاوایێ ئەندازیارێ جڤاکی رۆژەڤا جڤاکێ بەرەڤاژی دکەت، ئەو تشتێن نەھەوجە وەکی پرسگرێکا بنگەھین د دەته دیار کرن، ئەو پرسگرێکێن گرنگ ژی پاشگوھ دکەت، و ب ڤی شێوەی خهلك راستیێ نزانیت، نموونه، کو دبێژت: «ئازادییا ئۆجەلان دێ تەڤاھییا کوردستانێ و رۆژھلاتا ناڤین روهن كهت» تنێ چیرۆکەکە، گەر پهكهكێ ئەو کەدا کوردێن باکور یا 20 سالان ئەوا کو ژ بۆ ئازادیا عهبدوللا ئۆجالان ھاتییە دان بۆ زمانێ کوردی ھاتبا دان، نوكه زمانێ کوردی ببا زمانەکێ فەرمی و ھەموو کورد دا پر مفایێ ژێ وەرگرن، لێ پهكهكێ ئەڤه نەکر، ل رەخمی ھەمی رەخنە و نێرینان ب ژیری ھەمان خەت دا سەپاندن.
ناپلیۆن دبێژیت: «ھونەرا پەیڤێ تنێ دوبارەکرنە»، گەر ھوون تشتەکێ ب ههمان پەیڤان بێ ناڤبر دوبارە بکهن، پشتی دەمەکێ ئالیێ بەرامبەری تە دێ وان گۆتینێن تە وەک راسیتییەکا بێ گومان بینیت و پێ باوەر کەت، پهكهكە ل گۆر ڤێ تەسپیتێ تەڤ دگەریت، کێم مرۆڤێن کو دبێژن ئازادییا ئۆجالان دێ تەڤاھییا رۆژھلاتا ناڤین روهن كهت، دشێن ل سەر ڤێ مژارێ چەند ھەڤۆکێن جودا چێبکهن، ژ بەر کو ئەو ڤان ھەڤۆکان ب ژبەرکرنێ د ئاخڤن، مەژی ئۆتۆماتیکی كار دكهت.
ما پێدڤی ب كهمپینەکا «پهكهك ئەدی بەسە وەرە سەر رێیا نەتەوەیی» ھەیە؟
ئەڤ پێنگاڤا پهكهكێ تنێ ل سەر بنگەھێ قورخكرنا پێڤاژۆیێ ھاتییە ئاڤا کرن، ئەو وەزیفەیەکێ ددەته ھەر پارچەکێ، نموونه، رۆژئاڤا ب وەزیفەیەکا مەزن وهك یەکیتییا نەتەوەیی روو ب روویە، ئەو یەک ژ قادا سەرەکەیا شەرێن ھەگەمۆنیکێن جیھانێ یە، لێ پهكهكە ڤێ بانگێ ل گەلێ رۆژئاڤا دکەت: د بێژیت داکەڤن قادان، گەل د گۆری ڤێ بانگاوازیێ وێنەیێن ئۆجالان ههلدگریت و دەردکەڤیتە قادا، لێ بەلێ، نە بەرژەوەندی و نە ژی چارەنڤیسا گەلێ رۆژئاڤا ب كهمپینهكێ ههیه ژ بۆ راکرنا تەجریدا ئۆجالان کو ژ ھێلا قەندیلی ڤە ھاتییه دیار کرن، چارەنڤیسا گەلێ رۆژئاڤا ئەوە کو پارتیێن کوردی یێن ل قامشلۆ بریار داینه كۆمببن و ب دیپلۆماسییەکا ھەڤپار ژ بۆ رۆژئاڤا ستاتۆیەکا ناڤنەتەوەیی ساز بکهن، نڤیسکارێن پهكهكێ یەکیتییا د ناڤبهینا کوردێن رۆژئاڤا دا شەرمەزار دکهن، لێ پهكهكە ھەول ددەت کو ڤێ راستیێ ب تەجریدا ئۆجەلانی ڤەشێریت.
نها، یەک ژ مەترسیێن ھەری مەزن ژ بۆ کوردان ئەوە کو ئەو قورخ كرنا رۆژەڤێ یا ژ ھێلا پهكهكێ دهێته کرن، گەر کورد بخوازن کو ژ ڤێ سەدسالێ دەما کو پەرگالا سیاسی یا جیھانێ گوھەری، ب دەست خوە بێخن، دڤێت ئەو ژی د سیاسەتێ دا ریالیست بن، خۆ ژ خەیالپەرەستییا دەرەو و قورخ كرنا پەیڤان، ئیفادە و دوبارە کرنێن پهكهكێ دوور بکەن، ھەکە پێدڤی ژی بكهت، دڤێت کورد ل دژی پهكهكێ دەست ب كهمپینا «پهكهكە ئێدی بەسە وەرە سەر رێیا نەتەوەیی» بکن.
