ئاشتی بتنێ ب بێدەنگبوونا چەکان ناهێتە پێڤان، پێدڤییە ئەو مافێن کو پشتی بێدەنگبوونا وان چەکان پەیدا دبن ژی بهێنە پیڤان. شەر دشێت ب دوو شێوەیان ب دوماهی بهێت: یان ژ بەر کو ستەم ب دوماهی هاتییە یان ژ بەر کو لایەک ئێدی نەشێت بەردەوامییێ بدەتێ.
یا ئێکێ ئاشتییەکا ل سەر دادپەروەرییێ هاتییە ئاڤاکرن و یا دووێ دشێت دانپێدانەک ب شکهستنێ بیت، هەرچەند ناڤێ سەرکەفتنێ لێ بهێتە کرن.
عەبدوللا ئۆجالانى بانگەوازی ل پهكهكێ کر کو کۆنگرەیا خۆ پێک بینیت و چەکان دابنیت و خۆ هەلوەشینین و دگەل دەولەت و جڤاکێ تێکهەل ببن.
بۆ ڤێ بریارێ ژی گوت: پهكهكه ل سەردەمێ شەرێ سار، سۆسیالیزما راستەقینە و ئینکارکرنا ناسنامەیا کوردی پەیدا ببوو، پشتی گۆهۆرینا وان بارودۆخان و هۆکارێن بەردەوامبوونا وێ ژی دوماهی پێ هات.
بدوماهیئینانا شەرەکێ 40 سالی خیانەت نینە. نەتەوەپەروەرییا بەرپرس و راستگۆییا خۆ ب ژمارا کوشتییان ناپیڤیت، بەلکو ب شیانا پاراستنا گەل و گۆهۆرینا قوربانییان بۆ ماف و دامەزراوەیان دپیڤیت.
لێ پرسیارا سەرەکی ئەو نینە: ئەرێ پێدڤییە شەر براوەستیت؟ پرسیار ئەڤەیە: پشتی راوەستاندنا شەری، نەتەویا كورد چ ب دەست دئینیت و کورد د بەرامبەر هەلوەشاندنا پارتیێ دا چ دەستکەفتێن سیاسی و یاسایی وەردگرن؟
د ڤێ کۆمبوونێ دا، ئۆجالان داخوازا یاسایەکێ دکەت کو رێکێ بدەت گەریلا ڤەگەرن، نەهێنە دەستەسەرکرن و د ژیانا سیاسی دا بەشدار ببن. هەروەسا داخوازا کۆمیتەیەکێ بۆ تێکهەلبوونا دیمۆکراتی و دانپێدان ب رۆلێ خۆ یێ جێبەجێکرنێ دکەت. ئەڤ داخوازە پتر گرێدایی چارەنڤیسێ رێکخراوێ و سەرکردە و کادرێن وێ نە، لێ ئەو ب تنێ چارەسەرییەکا نەتەوەیی پێک نائینن.
دۆزا کوردی بتنێ ب ڤەگەرانا گەریلا بۆ مالێ ناهێتە چارەسەر کرن. ئەو دۆز بدانپێدانەکا دەستووری ب گەلێ کورد، پاراستنا زمان و ناسنامەیا کوردی، مافێ برێڤەبرنا خۆ و بەشدارییا ئازاد د دیارکرنا پاشەرۆژا خۆ دا دخوازیت. ئەگەر چەک بێی مسۆگەرکرنا ڤان مافان بهێنە دانان، دەولەت دێ کێشەیەکا ئەمنی چارەسەر کەت، لێ بنەمایێ دۆزا کوردی دێ هەر مینیت.
ل ڤێرێ جوداهییا د ناڤبەرا چارەسەرکرنا ململانێ و برێڤەبرنا دووماهییا وێ دا دیار دبیت. چارەسەرکرن پەیوەندیێ د ناڤبەرا دەولەت و گەلى دا دگۆهۆریت، راسته رەفتارا رێکخراوێ دگۆهۆریت و پێکهاتەیا دەولەتێ وەک خۆ دهێلیت.
