کەریم قادر

ل سەر بنگەھا وێ راستیێ “ئەم ناھێلن کەس زیانێ بگەهینە ئاسایش و ئاشتیا مە”. وەک چاوا ئەم ل ھەمبەری داعش و حەشدا شەعبی سەکنین، ئەمێ ھەر وسا ب جانەکێ فیداکاری د روویێ ھەر ھێزەکێ دا راوەستین، ئەگەر ئەو ھێز بخوازیت ئارامیا خەلکێ مە خراب بکەت. د سەری دا ھوون یێن کو وە ریا خوە وندا کریە، دەست ژ ھەرێما کوردستانێ بەردەن و روویێ خوە ل ھەمبەری خەلکێ ھەرێما کوردستانێ سپی بکەن، پشترا وەرن تۆمەتان بۆ پەدەکێ دروست بکەن. ھوون د چارچۆڤەیا جێبەجێکرنا بەرژەوەندیێن خەلکێ غەریب دا، ژبلی کو وە ھەرێما کوردستانێ ئێخستیە ناڤا کێشەیێن خوە دا، ھوون بوونە گەفەکا راستی ل سەر ئاسایش و ئاشتیا ھەرێما کوردستانێ، کو نھا ھەوجە ناکەت ئەز بەحسا ھەموو کرۆنۆلۆژیایا کارێن وە یەک ب یەک بکەم. وە کەنگی ھزر کریە ژ بۆ دۆزا کوردان؟ حەتا کو ھوون بێژن ئەم بەرخوەدانێ دکەین ژ بۆ گەلێ کورد؟ بەروڤاژی ڤێ گۆتنا وە، ھەر دەمەکێ دەرفەتەک ژ بۆ گەلێ کورد بدەستڤە ھاتبیت، وە ب پلان دژایەتیا وێ کریە. مادام ھوون وێ راستیێ دزانن کو وەلاتێن جیھانێ ناڤچەیێ ژ نووڤە دروست دکەن و ھوون دبێژن چارەنڤیسا گەلێ کورد وندایە و ھوون فیداکارێن خوە دکەنە قوربانی، دێ بریارەکا مێرانی بدەن و فیداکارێن خوە ببەنە قادا راست، نە روونێن و رەخنەیێ ل تەڤگەرا پێشمەرگە ل ناڤا ئاخا ھەرێما کوردستنێ بگرن، کو پاراستنا ڤێ ئاخێ د دەستێ پێشمەرگە دایە.

گەلۆ چ جاران وە ژ خوە پرسییە، کا ئەم بۆچی ل ڤێرەینە و ئەم ل ڤێرە چ دکەین؟

د چارچۆڤەیا درەوێن وە دا، کۆمیتەیا پەیوەندیێن کەجەکێ گەلەک ب بێشەرمی ل دژی پارتی دبێژیت: “ئارمانجا پارتی ئەوە کو رێ ڤەکەت و رەواتیێ بدەتە ئێریشا ل سەر تەڤگەرا مە.”

یێ نەزانت، دێ بێژیت تەڤگەرا وان ل قادا خوەیا راستی یە و پەدەکە ژی دخوازیت ئێریشێ بکەتە سەر جھ و ناڤەندێن وان. نزانن کو ئەرکێ حکوومەتا کوردستانێ ئەوە کو ل ھەرێما کوردستانێ پاراستنا جان و مالێ خەلکێ خوە بکەت و کوودەرێ پێویست بکەت، ل وێرێ خالێن کۆنترۆلێ دانیت. پێدڤی ناکەت حکوومەتا کوردستانێ پرسیارێ ژ پەکەکێ بکەت، کو پەکەکە بەلایەکا خوین گرانە.

دو تشتان هێلایە کو پەکەکە تەنگاڤ ببیت و ب ڤی رەنگی بێبەختیان بێخە ستۆیێ پەدەکێ، کو ئەڤنە:

یەکەم: کەشفکرن یان خویاکرنا پێنگاڤێن خەرابێن پەکەکێ یێن کو دخواستن ل ھەرێما کوردستانێ بکەن، لێ ژ ئالیێ ئەنجوومەنا ئاسایشا ھەرێما کوردستانێ ڤە ھاتنە ئاشکەرا کرن.

دویەم: ژ لایەکێ ڤە، باندۆرا رێکەفتنا گرینگ و دیرۆکی یا لایەنێن رۆژئاڤایێ کوردستانێ ب سەرپەرشتیا ئەمریکا. ژ لایێ دی ڤە ژی رێکەفتنا حکوومەتا کوردستانێ و حکوومەتا ئیراقێ یا ل سەر شنگالێ.

پەکەکە دبێژیت: “رۆژانە دەنگێ تەقینا بۆمبە و تۆپ و رۆکێتێن ترکیێ ل سەر چیا و نەوالێن کوردستانێ تێن،”

ما ئەگەر تەڤگەرا وە وێ راستیێ ڤەشێریت، خەلکێ کوردستانێ دزانن سەدەما وان تەقین و بۆمبەبارانا کییە. و دزانن کی باجێ ل سەر سینۆر ژ وان دستینن.

هەرچەند کو ناخوازم ل سەر وێ پاراگرافا داخویانیا پەکەکێ باخڤم، کو تێدا دبێژن: “ب سەدان ھەڤالێن گەریلا ژ بۆ پاراستنا گەلێ باشوورێ کوردستانێ ژ شنگالێ و حەتا ھەولێرێ جانێ خوە فەدا کرینە و فەرماندارێن مینا زەکی شنگالی و عەگید جڤیان و تێکۆشەر گەڤەر د ڤێ ریێ دا شەھید بوونە.”

لێ ئەز نەچار بووم بێژم، د شەرێ پاراستنا ھەرێما کوردستانێ دا ل دژی داعش و حەشدا شەعبی یەک گەریلایێ وە بریندار نەبوویە، ھوون بەحسا کیژا فیداکاریێ دکەن؟ یان ئەز دترسم ھوون وان سیخورێن کو د ناڤا وە دا بوون و وە ئەو کووشتنە، وەک فیداکار ببینن. ئێدی خەلک زیرەک و ھشیارن و مافێ وە تونەیە کو ھوون بەحسا نشتمانپەروەریێ بکەن.