85 سازیێن سڤیل ئێریشێن ل دژی ئامەدسپۆرێ شەرمەزار کرن

85 سازیێن سڤیلێن دیاربەکرێ ئێریشێن ل دژی ئامەدسپۆرێ ب داخویانیەکێ شەرمەزار کرن و خواستن کو بورساسپۆر ب بریارا دادگەر، تێکچوویی بهێت راگھاندن و یاریزانێن وێ تیمێ یێن ئێریشکاری کرنە ھەتا ھەتایێ ژ یاریێ بهێن قەدەغەکرن.

دوھی یەکشەمبێ یاریا بورساسپۆر و ئامەدسپۆرێ ل ستادیوما بورساسپۆر ھەبوو و ئالیگرێن بورساسپۆرێ ئێریشێ یاریزانێن ئامەدسپۆرێ کربوون و درووشمێن نیژادپەرەستی بلند کرنە و پانکارتێن کو پەسنا تاوان و تاوانباران ددە خستنە ناڤ یاریگەھێ.

د ڤێ دەربارێ دە، 85 سازیێن سڤیلێن دیاربەکرێ ئێریشێن ل دژی ئامەدسپۆرێ د کۆنفەرانسەکا رۆژنامەڤانی دا ب داخویانیەکێ شەرمەزار کرن. داخویانیا رۆژنامەڤانی ژ ئالیێ سەرۆکێ بارۆیا دیاربەکرێ ناھیت ئەرەن ڤە ھاتە خوەندن.

ناھیت ئەرەن دیار کر کو، دڤێت بورساپۆر ب بریارا دادگەر، تێکچوویی بهێت راگھاندن و یاریزانێن بورساپۆرێ کو ل دژی یاسایێن وەرزیشێ تەڤگەریانە بهێن دیارکرن و ژ یاریێن فەرمی ھەتا ھەتایێ بهێن قەدەغەکرن.

ھەروھا تەکەزی ل سەرێ وێ یەکێ ھاتە کرن، ھاندەرێن کو نیژادپەرستی و ئێریشکاری کرنە درووشمێن نیژادپەرەستی، کرێت و نەفرەتێ بلند کرنە و پانکارتێن کو پەسنا تاوانێ و تاوانباران ددە خستنە ناڤ یاریگەھێ، ژ تەماشەکرنا یاریان بهێن قەدەغەکرن.

ھەر وھا ناھیت ئەرەن گۆت کو، دڤێت ب بریارا فەدەراسیۆنا فوتبۆلێ یا ترکیەیێ، بورساپۆر ھەتا داویا وەرزێ فوتبۆلێ، یاریێن خوە بێ ھاندەر ئەنجام بدە.