سەلاحەدین دەمیرتاش د گرتیگەھا ئەدیرنەیێ دە لگەل مالپەرا «ئارتی گەرجەک» ھەڤپەیڤینەک کر و ل سەر حەسابا خوە یا تویتەرێ دیار کر کو ئەو ژ سیاسەتا ئەکتیف ڤەکشیایە. لێ تام پشتی داخوویانییێ چاڤێن خوەگرتن و دەڤێ خوە ژ بۆ ھەدەپێ ڤەکر.  ب شێوازەکێ بانگ ل ھەڤسەرۆکێن ھەیی یێن ھەدەپێ کر کو ئیستفا بکن و وی گۆت، “گەل کۆنگرەیێن ئاسایی و گوھەرتنان دخوازە.” واتە ب ئاوایەکی راست لێدا و چەپ ڤەگەریا. دەمیرتاش ل شوونا کو ژ سیاسەتێ دەرکەڤە، بەرۆڤاژی ڤێ یەکێ ژ نوو دخوازە سییاسەتێ ل گۆری خوە دیزاین بکە. ھەما پشتی وی «ئەحمەد تورک و سەزای تەمەلی» رابوون سەر خوە و گۆتن دەمیرتاش نکارە دەست ژ سیاسەتێ بەردە. د راستیێ دە  دەمیرتاش نە دەست ژ سیاسەتێ نە ژی دەست ژ تشتەکی دن بەردایە.

پشتی ھەر تێکچوونەکێ لایەن ل “گیسکێ سەدەقێ” دگەرن؟

پشتی ھەر تێکچوونەکێ، یێن مایی ھەڤدو تاوانبار دکن. گیسکەکێ سەدەقێ دهێت دیتن و ھەموو تاوان دکەڤن سەر ستوویێ وی. ھەدەپێ شکەستنەک مەزن خوار و نھا ھەر کەس ھەول ددە یێ دن گوونەھبار بکە. د ناڤبەرا ئیمرالی، دەمیرتاش، قەندیل و ھەدەپێ دە ھەر تم شەرێ سار ھەبوو. نھا وسا دخویە کو ئەڤ شەر دێ ڤەگەرە لیستکا کورسی و پۆستان.

رێڤەبەریا پەکەکێ یا ل قەندیلێ دێ ھەدەپێ و دەمیرتاش رەخنە بکە و بێژە ھەدەپە دانەکەت ناڤا گەل، پارادیگما سەرۆک راست فێم نەکر و ژ رایا گشتی دوور ما. ئەوێ ھەر دو ئالیان بەردە ھەڤ. ب تایبەتی پەکەکە دێ ھەول بدە پۆپولیزما دەمیرتاش ژ ناڤ ببە. ئێدی سیبەرا دەمیرتاش کەت بوو سەر ئیمرالی و قەندیلێ. ئانکو دەمیرتاش رۆل ژ پەکەکێ دزیبوو. ئەڤجا دبێژە گەل بەرخوەدان ژییانە، بەرخوە بدن. پەکەکە دێ وەکی کو ئەو نە بەرپرسیارێ تێکچوونێیە تەڤبگەرە.

دەمیرتاش، دەما کو نەشیایە کەری هەڤلدا پالیێ

دەمیرتاش؛ ژ ئەندازیارێن هەڤپەیمانیا بێ داخوازی ل گەل جەهەپێ یا ل دژی ئەردۆگانە. دەمیرتاش ببوو چەکدارێ ھەری ب کەلەجان یێن خەتا ترکبوونێ، ئەرکا خوەیا پاراستنا ئالایێ ترکان و سروودا ترکان ب جھ ئانی. سەر وەختێ HEP-DEP و ھەیانی BDP ئالایێ ترکان یێک ژ ھۆکارێن ئەساسی بوو ژ بۆ گەرتنا ڤان پارتییان. ژ بەر کو ئالایێ ترکان نەدھات ھلدان. لێ «سەلۆ جان» ئالیێ ترکان دا دەستێ جوانێن کورد و ب وان دا بلندکرن. ئەو دخوازە د سیاسەتێ دە بەردەوام بکە و پر ب ھێرسە.  ب راستی ھەر کەس دزانە کو بریارا لایەنگرییا کاندیدێ سەرۆککۆماریێ و ستراتەژیا ھلبژارتنێ ژ قەندیلێ ھاتنە گرتن.  لێ وەک گۆتنا ناڤدارا کوردان دبێژە، “دەما کو نەشیای کەری هەڤلدەتە پالیێ.” دەمیرتاش دزاینبوو کو قەندیل وێ ھەول بدە وی بتەپسینە، وی ژی ب مەنتقا “پاراستنا ھەری باش ئێریشە” و بەریا ئەو ئێریشی سەر وی بکن، ئەوی ئێریشی ھەدەپێ کر.

کادرۆیێن پەکەکێ دێ زێدەتر ھەدەپێ کۆنترۆل بکن

ئالیێ ھەری قەلس د ناڤا ھەدەپێ دە کوردن. ھەدەپە ژ گەلەک باسکان پێک تێ. د ناڤ ڤان باسکان دە باسکێ دەولەتێ، باسکێ چەپێن ترکان، باسکێ پەکەکێ، باسکێ رانتخوەر “مشەخوور” یێن کو ئەڤ 40 سالن ل سیاسەتا مەشرووعا کوردان سوواربووین، ھەنە. ھێزا چ باسکان ب تەنا سەرێ خوە نینە کو ھەدەپێ  رەخنە بکە و بەرسڤا رەخنەیان بدە. لێ بەلێ د ناڤا ھەدەپێ دە گرووپەک کو نوونەرتیا پەکەکێ دکە ھەیە ئەو دکارن تەعلیماتان بدەن ھەر کەسی. ب ئیحتیمالەکا مەزن ئەڤ باسکێ پەکەکێ یێ د ناڤ ھەدەپێ دە دێ بێھتر چالاک ببە. ئەڤ کۆمە دێ شەرێ خوەیێ سار لگەل دەمیرتاش بەردەوام کن. دێ چەند کەس وەکە بزنا گوونەھکار هێن دەستنیشانکرن و ژ بۆی کو کارڤەدانێن خەلکی بێدەنگ بکەن دێ وان کەسان سزابدەن. لێ دێ ئۆپەراسیۆنا پەکەکێ یا ل سەر دەمیرتاش ب شێوەکی بەردەوام بت.

گەر لگەل ئۆجالان ھەڤدیتن چێببە ئەو دێ ھەم قەندیل، ھەم دەمیرتاش و ھەم ژی ھەدەپێ تاوانبار بکە. وەکە کو ئەم ھەمی دزانین ئەڤە 45 سالن ئۆجالان چ جاران نەھاتییە رەخنە کرن و ئەو وەکە کەسەکی بێ کێماسی و بێ گونەھ دهێت دیتن. ل گۆری ئۆجەلان کەس وی فەھم ناکە…

لێ تێکچوونا ھەدەپێ ژی مینا تەرمەکێ ل ھۆلا سییاسەتێ دە بێخوەدی مایە.

دەمیرتاش ب تاکتیکا ئۆجالان تەڤدگەرە

دێ شاشبە کو مرۆڤ ببێژە؛ دەمیرتاش ب راستی ژی ژبۆی خوە رێکێ ل بەر تەڤگەرەکا نوو ڤەدکە. ب راستی ئەم ڤێ تب اکتیکا ئۆجالان دزانین. دەما کو ئۆجالان سەرپەرەشتییا ھەموو وەلات، مالییە، سیاسەت، دیپلۆماسی، شەر، پەروەردە و ھتد دکر گاڤا بنکەتنەک چێدبوو  وی دگۆت “ئەز دەست ژکارکیشانێ ژ پەکەکێ دکم” ب ڤی رەنگی وی نەدھشت تەوانبار بهێت دیتن.

تاکتیکا دەمیرتاش ژی وسایە. دەمیرتاش ژی بەرپرسیارێ ھلوەشاندنا باژارێن کوردستانێیە. بەرپرسیارێ ڤێ تێکلیا بێ داخوازیا لگەل جەهەپێ یە. وی ھەڤژینا خوە ژی بۆ ب جەهەپێ بدە قازانج کرن خست ناڤا لڤ و تەڤگەرێ. یێ ھەری زێدە ئالایێ ترکبوونێ بلند کری و کورد هاندای ژ بۆی ترکبوونێ دەمیرتاش بوو.

دەولەتێ پێشی ل دەمیرتاش نەگرت

 کێ ھەموو ئەڤ کریارە ب دەمیرتاش دانەکرن، جھێ گومانێیە. میناک چما هیچ گرتیەک د گرتیگەھێ دە نکارە وەکە دەمیرتاش مەدیایا جڤاکی بکار بینە؟ دەولەتێ دکاربوو پێشی ل دەمیرتاش بگرە کو ھەر رۆژ سیاسەتێ ب رێ ڤە نەبە لێ چما نەکر؟ تێ گۆتن کو گرتیێن سیاسی ھەر رۆژ ل گرتیگەھان د بن تەجریدێ دە نە، گەلۆ چاوا دبە کو دەمیرتاش ژ سیاسەتمەدارەکی ل دەرڤە زووتر و بێھتر مەدیایا جڤاکی ب کار بینە؟ ئەڤ ھەموو مژارێن مەژییێ مرۆڤی تەڤلیھەڤ دکن. دەمەکێ ئۆجالان ل ئیمرالیێ شەر رادگەهاند، رێڤەبەرێن کەجەکێ دەستنیشان دکرن و تەعلیمات دشاندن. گەر ئەڤ کارەنە کێری دەولەتێ نەھاتبان ما دا رێکێ دەت؟

  ژ بلی ڤێ، دڤێت یەکسەر بهێت زانین کو سیاسەتا دەمیرتاش ھەری زێدە ب کوردان دا وندا کرن و ھەری زێدە ژی ترکان قەزەنج کر. پێدڤییە کو ئەم ھێژ بێھتر ل سەر ڤان مژارا بسەکنین.

دۆزا کوردستانێ ل سەر کەس و پارتیان دایە

ل بەرچاڤە کو پارادیگمایا سیاسی و پێکھاتەیا سیاسی ئیفلاسکرییە. کورد ل باکورێ کوردستانێ کەتنە خاچەرێکەکێ، مەجبورن کو ژ بۆی خوە رێیەکا نوو ڤەکن. یا کو ب لەزگینی دڤێت بهێیت نیقاشکرن ئەڤە. نە حەزا دەمیرتاش کو خوە بکە ئۆجالانەک بچووک، نە غروورا پەکەکێ یا کو کەس نکارە بکەڤە پێشییا مە، نە شەر و پەڤچوونێن کۆمێن پچووکێن د ناڤ ھەدەپێ دە… چ ژ ڤان رۆژەڤان نە رۆژەڤێن رێزا یەکەما کوردانە. ئەڤ گرووپە ھەموو دەما کو رانت “مشەخووری” ھەبە ب ھەڤ رە دخوەن، دەما تێکچوونەک چێببە، ل پشت گەل خوە ڤەدشێرن و شەرێ ھەڤ دکن.

  ھەر تشت پێشی د ھشێ مرۆڤ دە دەست پێ دکە. دڤێت کورد زیھنیەتا خوە ژ نەساخییێن کو ئۆجالان ئەو تووش کری “کوردان ژ بۆ ھەبوون و پێشەرۆژا کۆمارا ترکیەیێ فەدا دکە” رزگار بکە. دژی سییاسەتا ئۆجەلان راوەستن. ھەتا کو ئازادیا کوردستانێ د سەر ھەر کەس و پارتیێ رە نەھێ گرتن، کورد نکارن خوە ژ ڤێ ھەری و تەقنا 40 سالی یا پەکەکێ رزگار بکن.