چەتەیێن سەر ب پەکەکێ ڤە زارۆکەکە دن یا 16 سالی رەڤاند

ل باژارێ عاموودێ یێ رۆژئاڤایێ کوردستانێ زارۆکا 16 سالی یا ب ناڤێ سەعدیا عەزیز ژ ئالیێ چەتەیێن ب ناڤێ “جوانێن شۆرەشگەر” ڤە کو راستە راست فەرمانان ژ قەندیلێ وەردگرن ھاتە رەڤاندن.

دایکا زارۆکا رەڤاندی د ھەڤدیتنەکا تەلەفزیۆنی دە راگھاند کو رۆژا دوشەمبێ 16 شباتا 2024 دەما ل گەل برایێ خوە ژ مالێ دەردکەت ل باژارێ عاموودێ یێ رۆژئاڤایێ کوردستانێ چەکدارێن جوانێن شۆرەشگەر یێن سەر ب پەکەکێ ڤە کەچا وێ سەعدیایا 16 سالی رەڤاندن.

ئیبراھین تەکەز کر و گۆت وێ سەرەدانا تەڤایا دام و دەزگەھێن ب سەر رێڤەبەریا پەیەدێ کریە، و د دەستپێکێ دە رەد کرن کو کەچا وێ ل جەم وانە، و پشتی دەرباسبوونا 3 رۆژان ب سەر رەڤاندنا کەچا وێ یا رەڤاندی سەعدیایێ یەک ژ چەکدارێن “جوانێن شۆرەشگەر” پەیوەنی ب وان کر و ژ وان رە گۆت کو کەچا وان ل جەم وانە، و راھینانا لەشکەری دکە.

سەعدیا عەزیز ژدایکبوویا باژارێ عاموودێ یێ رۆژئاڤایێ کوردستانێ یە، سالا 2008.

فەرماندارێ ھێزێن سووریا دەمۆکراتیک مەزلووم کۆبانێ د سالا 2019 دە ل ڤێرجینیا گامبا نوونەرا نەتەوێن یەکگرتی بۆ کارووبارێن زارۆکان، ل سەر پەیمانەکێ ئیمزە کربوو، کو ئێدی زارۆکان تەڤلی ھێزێن خوە نەکە و زارۆکێن د ناڤ دە سەربەست بەردە، لێ تا نھا چ پابەندی ب وێ پەیمانێ نەھاتیە کرن، ھەر دەم چەکدارێن ب ناڤ و رەنگێن جودا د ناڤا هەسەدێ دە زارۆکان درەڤینن و تەڤلی لەشکەریا نەچار دکن.